Die staat het al meer as 600 kommersiële plase teen sowat R2,6 miljard gekoop wat op ’n bruikhuurgrondslag aan nuwe boere beskikbaar gestel word, sê mnr. Mdu Shabane, adjunk-direkteurgeneraal van Landelike Ontwikkeling en Grondhervorming.

Hy het in Pietermaritzburg gesê dié plase is gekoop as deel van die program om landbougrond te bekom. Dit is vir sy departement ’n voorrangsaak om ’n nuwe generasie boere suksesvol op die grond te vestig. Hy sê daar is ook R250 miljoen opsy gesit vir steun aan die boere met produksiehulpmiddele en ander ondersteuning.

“Dit is iets wat die departement nog nie voorheen gedoen het nie en ons begin nog in hierdie geldjaar daarmee.” Shabane sê een van die probleme wat ondervind word is die feit dat die staat die grondeienaar is. Omdat huurders nie die grond as sekuriteit kan aanbied nie, kan hulle nie produksielenings bekom nie.

’n Kredietgerief is geskep om produksielenings te onderskryf wat deur finansiële instellings toegestaan word.

Lees meer in Landbouweekblad se uitgawe van 2 Oktober 2009.

30 September 2009