Grondeise in die Suid-Kaap en Klein-Karoo is tot volgende jaar gevries weens ’n begrotingstekort. Mnr. Gert Hufkie, voorsitter van die Suid-Kaap- en Karoo-grondrestitusie-forum, sê sowat 5 000 eisers in dié gebiede wag tans op geld.

Hy sê mnr. Gugile Nkwinti, Minister van Landelike Ontwikkeling en Grondhervorming, het ingestem om sommige van die betrokke grondeisers vandeesmaand te besoek, lui ’n berig in The Herald. Hy sal teen middel vandeesmaand die kwessie heroorweeg, maar as daar geen geld beskikbaar is nie, sal eisers tot aanstaande Maart moet wag.

“Ons wag al 13 jaar lank vir ’n skikking. Party mense is al oorlede terwyl hulle vir hul geld of grond gewag het,” sê mnr. Christiaan Tamboer, een van die eiers van Kraaibos. Hufkie sê die begroting vir grondhervorming is vanjaar in die eerste drie maande opgebruik.

Bron:
The Herald

3 November 2009