Uiters gunstige terugvoering is vanuit die landbougemeenskap in die Wes-Kaap ontvang oor die
eerste Suiwelervaring wat verlede jaar plaasgevind het, derhalwe word ’n tweede suiweltentoonstelling nou beplan. Die tweede Suiwelervaring sal op 2 en 3 November op Sandringham buite Stellenbosch aangebied word.
Luidens ’n verklaring sê
Agri Expo: “Dié ervaring vier die totale waardeketting van suiwel in ’n provinsie wat voorloop ten opsigte van melkproduksie.”
Die geleentheid sal die
Wêreld-Suiwelberaad wat in November vanjaar vir die eerste keer in Kaapstad gehou gaan word, voorafgaan. “Die feit dat twee geleenthede wat met suiwel spog, rug aan rug in die Wes-Kaap aangebied word, beklemtoon die belangrikheid van hierdie lewendige bedryf,” sê mnr. Johan Ehlers, hoof uitvoerende beampte van Agri-Expo.
GebeureEen van die hoogtepunte van die Suiwelervaring is die nasionale kampioenskapsbyeenkoms vir Suid-Afrikaanse melkbokke wat aangebied sal word. Sowat 300 bokke sal in 160 verskillende klasse deelneem.
Verder sal topdiere uit drie suiwer suiwelbeesrasse,
Holstein,
Jersey en
Ayrshire, van die Vrystaat, KwaZulu-Natal en die Suid-Kaap meeding in die onderskeie ras- en interraskampioenskappe – asook vir die hoogste eer: Absa se Suiwelkoningin van die Jaar 2012. ’n Jeugskou-element, wat ’n belangrike rol speel in beroepsbewusmaking, word ook beplan.
Oud en jonk sal ook kan leer hoe om botter, kaas en sjokolade te maak by Woolworths se suiwelspens, terwyl verskillende kompetisies vir roomys-eet ook aangebied sal word.
Meer inligting is by www.capedairy.co.za beskikbaar.
