Die Verenigde Nasies se bepalings oor die vrystelling van kweekhuisgasse maak nie sin nie, sê CGIAR, wat aanvoer die voedselproduksie se aandeel 29% is.
 
’n Studie deur ’n landbounavorsingsorganisasie, CGIAR, bepaal dat voedselproduksie wêreldwyd sowat 29% tot die vrystelling van kweekhuisgasse bydra. Die organisasie het die ganse bedryf, van ontbossing, kunsmisproduksie tot vervoer, se bydrae tot gasvrystelling by sy studie ingesluit.
 
CGIAR se verslag, Klimaatsverandering en voedselsisteme, sê baie meer moet gedoen word om die vrystelling van kweekhuisgasse in die produksie van voedsel te beperk. Luidens ’n berig op News24.com bevindl die studie dat die bedryf verantwoordelik is vir tussen 19% en 29% van die gasvrystelling, wat amper dubbel soveel is as die 14% wat deur die Verenigde Nasies bevind is.
 
“Vanuit ’n voedseloogpunt maak (die VN se benadering) nie sin nie,” aldus mnr. Bruce Campbell, hoof van landbou, klimaatsverandering en voedselsekerheid by CGIAR.
 
Radikale veranderings
Die studie stel radikale skuiwe in baie lande voor, wat nie net vrystelling sal beperk nie, maar ook koste kan verminder. Dit stel voor dat China kunsmis doeltreffender kan produseer en vrystelling beperk, terwyl dit meen Brittanje kan vrystelling verlaag deur lams- en skaapvleis in te voer van meer effektiewe plase in Nieu-Seeland pleks daarvan om self skape aan te hou.
 
Dit stel ook wêreldwye veranderinge in die mens se dieet voor, deur meer vegetaries te eet en weg te beweeg van vleis. “Om gewasse te verbou om koeie, varke of skape te voer, gebruik baie meer grond en stel meer kweekhuisgasse vry as verbouing vir menslike verbruik,” aldus die organisasie.
 
Verder het die CGIAR bevind dat klimaatsverandering die verbouing van die drie grootste gewasgroepe, mielies, koring en rys, in die komende dekades in ontwikkelende lande gaan laat afneem. Dít kan boere dwing om gewasse wat meer hitte-, vloed- en droogtebestand is aan te plant, soos gars, akkerbone, lensies en piesangs.
 
Bron: News24.com