Blinker toekoms vir varkboere

Die volgende paar jaar lyk belowend vir plaaslike varkprodusente. Die SA Varkprodusente-organisasie (Savpo) is van die mening dat varkproduksie teen 2019 met 15% tot 20% gaan groei.

Volgens mnr Simon Streicher, hoofbestuurder van Savpo, gaan groot varkprodusente uitbrei, terwyl kleiner produsente die bedryf gaan verlaat omdat hulle nie winsgewend kan boer nie.

Oor die volgende tien jaar gaan die vraag na varkvleis internasionaal ook aanhou groei, het Streicher gesê. Hoofsaaklik sal die vraag na varkvleis van ontwikkelende lande kom as gevolg van groeiende bevolkings, 'n styging in die per kapita-inkomste van verbruikers en 'n verandering in die houdings van verbruikers teenoor varkvleis.

Oor die volgende drie tot vyf jaar sal daar heelwat gefokus word op die gesondheid van varke in Suid-Afrika. Dr Peter Evans, gesondheidsbeampte van Savpo, meen op die korttermyn is dit belangrik om te bewys Suid-Afrika is ontslae van varkkoors (CSF). Saam met nasionale veeartsdienste wil Savpo ook 'n serologiese opname, wat ander siektes ook sal insluit, maak.

Omdat daar nie meer op plaaslike insetverskaffers hoef staat gemaak te word om op die hoogte te bly met internasionale neigings nie, hoef Suid-Afrikaanse varkvleisprodusente - wanneer dit kom by toerusting en behuising - nie meer terug te staan nie.

Varkbehuising- en toerusting moet aanhoudend opgegradeer word om mededingendheid te behou, het mnr. Dalein Heyl van die Dalein Plaasbou Edms Bpk gesê.

25 Februarie 2009