Renosterstropery in kollig

Renoster. Foto: ANDRIES GOUWS

Stropery van renosters is die afgelope maand tydens die Verenigde Nasies (VN) se 15de kongres van die Kommissie op die Beheer van Handel in Bedreigde Spesies (Cites) in Doha, Katar, onder die soeklig geplaas.

Luidens ‘n verklaring van die Departement van Waterwese en Omgewingsake moes afgevaardigdes antwoorde oor die hantering van renosterstropery in Suid-Afrika voorsien weens die styging van voorvalle in die land.

Die departement sê afgevaardigdes van Cites is ingelig oor die stappe wat geneem word om wetgewing vir die beskerming van renosters daar te stel asook om handel in renosterhorings en verwante produkte binne die land te verbied.

‘n Nasionale eenheid vir die bestryding van misdaad verwant aan wild gaan ook op die been gebring word.

31 renosters vanjaar doodgemaak
Luidens ‘n berig van IOL sê die Internasionale Renosterstigting 31 renosters is vanjaar reeds in Suid-Afrika doodgemaak vir hul horings, terwyl Suid-Afrika se Parkeraad in 2008 36 en in 2009 50 renosters verloor het .

Volgens die berig het ‘n renoster in een van die jongste voorvalle in die Kruger-wildtuin oorleef nadat wilddiewe sy horing afgesaag het. “Dit is enigste geval waarvan ek weet waar ‘n renoster se horing afgesaag en die dier langs die pad geloop en sukkel het,” sê mnr. William Mabasa, woordvoerder vir die wildtuin.

Hy vermoed die wilddiewe het die dier verdoof voordat sy horing afgesaag is.

Proteas en Blouvin-tuna
Volgens die departement is daar tydens die vergadering ook gevra dat twee proteaspesies, die Swartland Sugarbush en Marsh Rose, ontlys moet word by Cites aangesien hulle nie aan die organisasie se lysvereistes voldoen nie.

Maatreëls vir die hantering van die daling in getalle van Blouvin-tuna is ook bespreek. Die vergadering het besluit dat distriksorganisasies soos die Internasionale Kommissie vir die Bewaring van Atlantiese Tuna dié daling moet aanspreek.

30 Maart 2010