Wreedheid met veediefstal

Die twee koeie se hakke is afgekap en moes vankant gemaak word. Foto verskaf

Boere kan bedag wees op ‘n toename in veediefstal oor Kerstyd omdat veediewe gewoonlik dan meer diere steel.

Mnr. Chris Botha, ‘n boer van die distrik Fochville, sê: “Natuurlik! Natuurlik gaan dit oor dié tyd toeneem. Dis nou die piektyd om beeste en skape te steel. Dis nou die tyd wat hulle vee bymekaar maak, en soms tot 20 diere op ‘n slag steel.”

Botha het Maandagaand, 19 Desember, vier beeste verloor nadat veediewe ses beeste gesteel het. Twee kon ongedeerd teruggekry word. Hy sê sy skoonpa, mnr. Carl van Heerden, het rondom 22:00 agterkom dat van die beeste vermis is.

Drie beeste se hakskene afgekap
Die beestekamp se drade is onmiddellik nagegaan, en die diere en diewe se spore is met behulp van boere in die omgewing in die rigting van die ou Rietfonteinpoortjie gevolg. Een bees is doodgesteek, drie ander se hakskene is gekap en die ander twee het die veld ingehardloop waar hulle later gevind is. Botha het die erg beseerde beeste vakant gemaak.

Botha meen dat veediefstal en die wreedheid wat daarmee gepaard gaan, net soveel aandag in die media en die gemeenskap moet kry as renosterstroping. “Die wreedheid wat partykeer met dié diefstalle gepaard gaan is onmenslik. Tienduisende beeste word in ‘n jaar gesteel, wat groot verliese beteken.”

Intussen sê kol. Oosie Oosthuizen, hoof van die SA Polisiediens se veediefstaleenhede, die jongste syfers wys ‘n effense toename in veediefstal. Hy sê hoewel dit ‘n neiging is wat gewoonlik dié tyd van die jaar voorkom, is die statistiek steeds onaanvaarbaar. “Een dier is té veel, en dit bly net onaanvaarbaar.”

Oosthuizen moedig veeboere aan om in die Kerstyd nie hul waaksaamheid te verslap nie, en seker te maak dat hulle vee gereeld getel word.

21 Desember 2011