Snotsiekte: Moenie beeste skuif

Blouwildebees. Foto: WIKIPEDIA

Die virus wat snotsiekte van blou- en swartwildebeeste na beeste oordra, leef nie voort in die veld nadat dié wild verwyder is nie, sê prof. Moritz van Vuuren, viroloog van die Fakulteit Veeaartsenykunde aan die Universiteit van Pretoria.

Van Vuuren sê die gevaar van snotsiekte verdwyn onmiddellik sodra wildebeeste uit die nabye omgewing gehaal word.

Beeste kan egter lank daarna steeds siek word omdat snotsiekte se inkubasieperiode gemiddeld 4 tot 8 weke is, maar in sommige gevalle etlike maande. Sommige bronne meen dit kan tot sewe maande duur voordat daar redelike sekerheid is dat verdere gevalle nie sal voorkom nie.

Om dié rede is dit nie raadsaam om beeste na 'n ander plaas te skuif nie, sê Moritz in antwoord op 'n boer se navraag op Vra vir Faffa op Landbou.com.

Koeie verloor
Die boer skryf hy het sewe dragtige koeie verloor aan snotsiekte waarna hy van al sy blouwildebeeste onslae geraak het. Hy wil weet of hy sy beeste moet skuif om verdere besmettings te keer.

Volgens Moritz word groot getalle beeste besmet wanneer snotsiekte op 'n plaas uitbreek maar minder word siek en vrek daaraan. Beeste wat nie siek word nie, bly egter draers van die virus en wanneer hulle aan stres blootgestel word (soos met verskuiwings), kan hulle siek word.

Dit is nie 'n algemene verskynel nie, maar dit verklaar sommige uitbreke sonder die teenwoordigheid van wildebeeste, sê hy.

Die volledige antwoord is beskikbaar op landbou.com se dieregesondheidsrubriek, Vra vir Faffa.

1 Februarie 2012