Mnr. Willie Clack, voorsitter van die RPO in Gauteng, vertel in ‘n nuusverklaring van dié ongewone verskynsel: Douvoordag op 17 Oktober, tydens ‘n toevallige voorkeer van voertuie by Magaliesburg,  het die SAPD op ’n baie ongewone verskynsel afgekom. ‘n Bakkie is afgetrek en by nadere ondersoek is vasgestel dat daar twee dooie koeie agterop die bakkie is.

Maar, die bestuurder van die voertuig kon géén verklaring verskaf oor hoe hy in besit van dié karkasse gekom het nie.  Die bestuurder, glo afkomstig van Soweto, is na die SAPD Magaliesburg geneem vir verdere ondervraging. 

Net ná sonop ontvang mnr. John Boon, ’n Bonsmara-teler van die plaas Sandfontein, in die Boons-distrik van Noordwes, ‘n ontstellende boodskap. Van sy stoetbeeste is vermink in die veld aangetref. Twee koeie se hakskeensenings is afgekap en ses ander koeie is erg vermink.

Beeste is gemerk en behoort aan stoetboer
Ná verskeie navrae is Boon, vergesel van mnr. Wessel Pistoruis (ondervoorsitter van die RPO in Gauteng) na die SAPD op Magaliesburg waar die twee koeie agterop die bakkie positief as dié van Boon geïdentiseer is.  In totaal 10 beeste, dus.

Volgens Clack is Boon se vee behoorlik gebrandmerk en identifiseerbaar. Lees die meegaande artikel wat ’n PDF-dokument insluit oor die verpligte identifikasie van vee.

Die Veediefstalforum in Gauteng en die RPO het die SAPD op Magaliesburg bedank vir die wakker optrede. ‘n Beroep word op die SAPD gedoen om nie net die verdagtes aan te kla ingevolge die Wet op Veediefstal (Wet 57 van 1959) nie maar ook ingevoge die Wet op Dieremishandeling. Dit is ook die intensie van die Gauteng RPO om, sou die beskuldigdes wel aangekla en skuldig bevind word, die hof te versoek om getuinenis ter strafverswaring te mag lewer, aldus Clack.

Naskrif: 'n Mens wonder net of die reisiger dalk nou al kan onthou hoe die karkasse op sy bakkie beland het?