Mnr. Attie Westraad, rasdirekteur van die
Dorpertelersgenootskap van Suid-Afrika, sê dit is die eerste keer dat deelnemers van vier verskillende lande by ’n enkele Dorperkursus in Suid-Afrika betrokke is.
Die besoekers wat Dorperland vroeër in Oktober besoek het, was mnre. Jaco Brits wat al 19 jaar lank in Paraguay woon, Daan Roux van Christchurch, Nieu-Seeland, Le Roux van Wyk van Namibië en Hennie Schutte van Botswana.
Suid-Afrikaanse Dorperinspekteurs reis gereeld na Australië, Brasilië, Mexiko en in Afrika om skoue te beoordeel, plaasinspeksies te doen en kursusse aan te bied. Daar is egter steeds telers wat die kursusse in Suid-Afrika, waar die Dorper oorspronklik geteel is, verkies en dit gee hulle ook die geleentheid om ander telers te ontmoet.
Westraad sê twee Australiërs, dr. Adrian Veitch en mnr. Dave Curtis, is deur dié land se
Dorpertelersgenootskap as inspekteurs aangestel nadat hulle die beoordelaarseksamen ’n paar jaar gelede ook in Suid-Afrika geslaag het.
Mnr. Boetie Burger, ’n legende in die Dorperbedryf wat al bykans die helfte van die klub se 54-jarige bestaan as sekretaris optree en al 22 kursusse op
Kenhardt gereël het, sê Dorperland se bedrywighede sluit ook die deelname aan Calvinia se vleisfees en die internasionale skou in Pretoria in.
Hy sê
Dorperland se kursus vir seniors word onder leiding van mnr. Hendrik van Zijl aangebied, terwyl 21 juniors die kursus deur mnre. Pilla Buys en Willemse Visser bygewoon het.
Volgens Burger sal Dorperland se ras-uitstalling gereeld op Calvinia se vleisfees te sien wees.
Die buitelanders wat Dorperland se kursusse onlangs deurloop het, is van links, mnre. Daan Roux van Nieu-Seeland, Le Roux van Wyk van Namibië, Hendrik van Zijl (kursusleier), Jaco Brits van Paraguay en Hennie Schutte van Botswana. Foto: Boetie Burger
