Geheime van rooikatvang

Die beste rooikathok wat geld kan koop, sal nie werk as dit nie reg of op die regte plek gestel is nie. Die vanger se ingesteldheid, kennis van hul gewoontes, die hok self en die lokaas wat gebruik word, sal alles 'n invloed hê op die welslae wat 'n mens met die stel van rooikathokke behaal.

Om roofdiere met 'n hok te vang, is nie maklik nie. Dit is 'n wetenskap.

As rooikatte 'n probleem is en bestry moet word, moet die vanger eksperimenteer en leer waar die diere se loopplekke is. 'n Rooikat sal byvoorbeeld nie in die nat veld stap nie. Hy stap eerder op die wal van die dam, om 'n donga, op die kant van die pad of op droë land. Hy sal ook nie in 'n pas gestroopte koringland loop nie, want die stoppels maak sy voete seer.

Daarom gaan ek, voordat ek 'n rooikathok stel, in 'n probleemdier-"mode", want as jy die probleemdier wil vang, moet jy soos die dier dink. Jy kan nie 'n hok op enige plek neersit en verwag om iets te vang nie. Buk af, buig jou knieë, kom tot op die kat se hoogte, en probeer sien wat hy sien.

Jy moet kan verstaan waar hy sal loop en hoekom. 'n Roofdier verkies dikwels om op 'n pad te loop, maar sal nie altyd padlangs loop nie. Hy sal hoeke sny en in reguit lyne stap. Moet dus nie 'n hok by die draai van 'n pad plaas nie.

'n Manier waarmee ek al heelwat welslae behaal het, is om 'n paar vere aanmekaar te bind en ongeveer 500 mm van die grond af in 'n boom te sit. So 4 m verder sit ek nog 'n paar vere en tussen die twee bondels vere die rooikathok. Die vere word só geplaas dat die kat dit maklik van die pad af kan sien. Dit dien as lokmiddel om die kat by die hok te kry.

As 'n skaap deur 'n rooikat gevang is, is die kortste pad na die prooi waarskynlik die roete wat die rooikat gevolg het. As twee paaie kruis, is dit die beste om die hok daar te plaas. Dit verdubbel die vangkans.

'n Hok moet nie in die middel van 'n oop stuk land geplaas word nie. Jy sal niks daar vang nie, veral nie as die land nat is nie. As daar 'n plek met bome is, is dit 'n moontlike plek waar 'n wyfiekat en haar kleintjies skuil. Stel 'n paar hokke daar.

Indien jy 'n skaap kry wat deur 'n rooikat gevang is en die skaap is met gras bedek, is die kans 99 % dat die kat na sy prooi sal terugkeer. Dit is 'n goeie plek om 'n hok te stel.

Die hok moet só gemaak word dat dit altyd honderd persent sal werk — selfs al roes dit 'n bietjie. Die trapplaat moet byvoorbeeld baie fyn gestel kan word.

Die grootte van die hok is belangrik, want 'n rooikat is baie versigtig en op sy hoede. Hy sal nie in 'n hok instap as dit te klein is nie. 'n Rooikathok moet verkieslik aan elke kant 'n valhek hê, want 'n rooikat hou daarvan om deur 'n hok te kan kyk. As 'n hok aan albei kante valhekke het, moet die trapplaat wyd wees en in die middel van die hok geplaas word. Albei hekke moet aan die trapplaat gekoppel wees.

'n Eenvoudige konsep is altyd doeltreffender. 'n Video is beskikbaar wat presies wys hoe die vanghokke gemaak word en hoe die verskillende onderdele werk.

'n Rooikat verkies om sy kos self te vang, daarom moet die hok en lokmiddels baie aanloklik wees. Daar is verskeie lokmiddels wat baie goed werk, maar 'n rooikat se urine is die beste.

Die rooikat se blaas (dit is altyd vol) moet saam met sy derms verwyder en alles in 'n bottel gesit word. Meng dié goed vir die beste lokmiddel in die wêreld.

Iets soos bokkems wat twee maande lank in 'n toe bottel met water gelos word of vrot dassievleis met heuning werk ook goed. Die vleis moet met gliserien besmeer word om dit teen maaiers te beskerm. Skaapwol is ook 'n goeie lokmiddel.

Ek maak my eie "rooikat-urine" en kry goeie resultate, maar het ook uitgevind dat 'n houer met Bostik-gom baie soos kat-urine ruik. Die reuk van 'n nuwe houer is sterk, maar dit raak ná 'n paar dae flou en moet vervang word. Dit kan ook aan 'n lappie gesmeer en in die hok geplaas word.

Seagro (plantvoeding) werk ook. 'n Lappie word daarmee benat en in die hok geplaas.

Al het jy nie skape verloor nie, is dit goed om die hokke te stel. Jy vang dalk 'n rooikat wat na 'n buurman se vee op pad is. Dit is 'n vermorsing as die hok in die skuur gelaat word.

'n Goeie hok wat reg gestel is, werk altyd. As 'n boer egter nie met hokke regkom nie, moet 'n professionele jagter se hulp ingeroep word om die rooikatte te roep en te skiet. 'n Roeper met baie fyn klanke vir rooikatte is beskikbaar. Dit werk goed.

Navrae: Die skrywer sal graag meer inligting oor hokke, handroepers, lokaas, ensovoorts verskaf. Sy e-pos-adres is sellis@telkomsa.net, en sy foonnommer 082 485 3885.

Vyand nommer een

Jakkalse en rooikatte is veeboere se vyand nommer een. Na raming vang jakkalse meer as 250 000 skape per jaar. Boere bestee elke jaar duisende rande aan die bestryding van hierdie probleemdiere.

Ongelukkig word onskuldige diere dikwels ook doodgemaak. Om te verseker dat net probleemdiere bestry word, moet boere hokke en roepers inspan.

Indien 'n onskuldige dier in 'n hok gevang word, kan hy vrygelaat word, terwyl jy met 'n roeper die keuse het om net die werklike probleemdier te skiet. Slagysters en gif bied nie hierdie onderskeid nie. Geen gif of slagyster is teikenspesifiek nie.

Om rooikatte suksesvol met hokke te vang, of jakkalse te roep en te skiet, is 'n fyn kuns. 'n Mens moet eksperimenteer, geesdriftig wees, vasberade bly en jou verbeelding gebruik. "Jy moet begin dink soos 'n roofdier om 'n roofdier te vang," sê mnr. Gary Laubscher, 'n professionele probleemdierjagter.

Hierdie artikel handel oor die vang van rooikatte in hokke. In die volgende artikel sal hy aandag gee aan die roep van probleemdiere met teikenspesifieke roepers wat gebruik kan word om rooikatte en jakkalse te bestry.

Dié wenke sal help

Die volgende wenke kan gebruik word om goeie resultate met rooikathokke te verseker: