My oupa het altyd gesê as jy niks goeds het om te sê nie, bly dan maar eerder stil. Dit is raad wat hom besonder goed te staan gekom het. Ná amper 102 winters in dieselfde klein boeregemeenskap in die Noordoos-Kaap, is hy na sy graf toe met bitter min mense wat ’n slegte woord oor hom kon rep.
Maar vir ’n joernalis is my oupa se raad hel. Om te vertel is tog immers wat ons doen en hoe ons ons brood en botter verdien. Ons praat. En dis so maklik en gemaklik om meegesleur te word in die meedoënlose stortvloed van negatiwiteit, want daar is tog immers so baie om oor te kla. En dis so gemaklik, en maklik om daaroor te skryf, want dit is oral.
Maar joernaliste, nes boere en ander gewone landsburgers, raak maar by tye moedeloos oor al die droewige nuus. Almal se gemoedere is swaar, wat ten minste nog ’n dubbele brandewyn en Coke en daardie laaste stomp op die vuur verg. Dit pla my al jare lank. Waar lê die uitkomkans/oplossing?
Dr. Michael Bradfield, die hoof van Breedplan, ’n belangrike beesverbeteringskema in Suid-Afrika, bied my toe ’n uitkomkans/oplossing een oggend vroeg in ons kantoor in Kaapstad. “Natuurlik kan jy kritiseer,” verduidelik hy, “mits jy bereid is om ook ’n bydrae te lewer. Elke mens moet besluit: Wil jy deel wees die probleem of deel wees van die oplossing.”
En toe stel jy voor dat Landbouweekblad ’n veeskool vir beginnerboere moet aanbied. Nie vir swart of wit boere nie, net beginnerboere. Natuurlik sou baie van die deelnemers swart wees. Met amper 40% van die nasionale kudde onder swart bestuur, het so ’n veeskool die potensiaal om ’n besonderse bydrae te lewer om swart boere te kommersialiseer, maar daar is ook jong, wit boere wat sekerlik baat sal vind by so ’n leerskool.
Oor die volgende paar weke gaan ons dus gereeld berig oor wat Landbouweekblad se Veeboerskool vir Beginnerboere gaan bied. Ons hoop dit sal darem help om al die ander swaar nuus op ons blaaie ’n bietjie ligter te maak.
Besonderhede van die Veeboerskool
Hoe? Landbouweekblad se Veeboerskool vir Beginnerboere gaan praktiese sessies in die oggend en middag aanbied, en daar sal deurgans kans wees om met die beste kenners in die bedryf gedagtes uit te ruil.
Wie? Onder die sprekers is mnr. Peter Massman, waarskynlik die leier in bulteling in Suid-Afrika. Hy sal ’n lesing oor die waarde van ’n bul in ’n kudde gee. Mnr. Isaac Montuang van Pick n Pay sal meer inligting gee oor hoe beesboere ’n voet in die deur by kleinhandelaars kan kry.
Waar? Die Aldam Landgoed by die Allemanskraal-dam in die Vrystaat.
Wanneer? 30 Julie tot 3 Augustus 2012. Die kursus kos R3 500 per persoon en besprekings sluit Maandag, 25 Junie 2012. Registrasievorms kan by www.stockmanschool.co.za afgelaai word, of bel Charmaine Alberts by 051 821 1783.
Hoe kan jy betrokke raak?
Mentorskappe het ‘n slegte naam. Niemand wil tog iemand help wat nie homself wil help nie. Dis so eenvoudig soos dit. Maar wanneer mens kans kry om iemand by te staan wat gretig is om te leer, dan kan groot dinge gebeur. Ons vra dus dat indien daar boere is wat bereid sal wees om vir beide swart en wit beginnerboere in hulle distrikte by te staan, dat hulle hul besonderhede sal deurstuur aan Charmaine Alberts by palberts@telkomsa.
Ons sal dan kyk of ons van die kursusgangers in verbinding met die boere kan sit. Alle inligting sal as vertroulik beskou word, en daar sal geen verpligting wees aan beide die kant van die mentor, of die beginnerboer, om die verbintenis deur te sien nie, indien dit nie werk nie.
* Chris Burgess is hoofredakteur van al die Landbou-titels in die Landbouweekblad-stal.
28 Mei 2012
