Helderberg Blue, ’n jaaroudvul van Jet Master by Our Table Mountain, het op die onlangse Cape Premier-veiling van jaaroue vullens, die hoogste prys van R2,8 miljoen behaal.

Helderberg Blue kom uit die stal van die Highlands-stoetery naby Robertson. Die veiling is vir die tweede jaar agtereenvolgens in die Kaapse Internasionale Konvensiesentrum aangebied en die gholflegende Gary Player (wat al meer as 50 jaar lank by die perdebedryf betrokke is) het dit as een van die beste veilings ter wêreld bestempel.

Die omset op vanjaar se veiling was R106 835 000 – sowat R18 miljoen meer as verlede jaar. Altesame 349 perde het onder die hamer gekom, waarvan 265 verkoop is.

Die gemiddelde prys wat vir ’n jaar oue vul opgedok is, is sowat R403 000. Ten spyte van die verbod op die uitvoer van perde weens Afrikaperdesiekte het kopers uit 15 lande steeds die veiling bygewoon.

Die Suid-Afrikaner John Freeman het meer as R14 miljoen op die veiling bestee en was die grootste koper. Die veiling is deur die Wes- Kaapse regering geborg. Kyk hier na 'n video van die opwindende veiling.

13 Februarie 2012