Nguni-geskiedenis uitgebeeld

'n Kosbare boek waarin die kleurryke geskiedenis van die Nguni-beesras en ook die ekonomiese, sosiale, politieke en geestelike betekenis van dié ras in die Zoeloe-tradisie verwoord en uitgebeeld word, het pas verskyn.

In hierdie fynproewerswerk ontvou die verhaal van dié Afrika-bees in poëtiese woordgebruik en kry dit lewe in kunstige skilderye, waterverfwerke en sepia-sketse deur die internasionaal bekroonde kunstenaar Leigh Voigt. Dit bevat ook sowat 20 geskiedkundige foto's, 8 historiese litografiese werke en 'n kaart van die verspreiding van dié beesras in Suid-Afrika voor die 19de eeu.

Die eerste hoofstuk gee 'n oorsig oor die rol wat beeste in die algemeen in die lewe van die Suidelike Nguni, en in die besonder in dié van die Zoeloe-nasie speel.

Oor die eeue heen het die kleurskakerings en die indrukwekkende patrone van die Nguni se huid, die prominente horings, die hangkruis en die unieke kwasstert 'n bepaalde emosie by die mens wakker gemaak. Betower deur die ryke skakerings en verskeidenheid, het die mens dié ras vergelyk met ander dinge wat aan hom bekend is: Inhlakuva (suikerboontjie), idube (sebra), imfezi (rinkhals of spoegkobra) en inkwazi (visarend). Dié vergelykings het in meer as 90 beskrywende benamings gestalte gevind en die oorsprong van dié name word breedvoerig bespreek. Verskeie indekse maak dit ook 'n nuttige naslaanbron.

Indien u een van dié mense is wat in die eeu van multimedia verkies om eerder te kyk as om te lees, is daar nie minder nie as 43 asemrowende olieverf- en 107 waterverfkunswerke om u te bekoor.

Enige veeboer wat nie nét deur 'n geldbril na sy diere kyk nie, maar ook uit liefde vir die saak met hulle boer, behoort ure se genot uit dié werk te put.

Hierdie is nie 'n handleiding om die Nguni-bees as ras te bevorder nie. Dit is ook nie net nóg 'n koffietafel-publikasie nie — dit is erfgoed en 'n ideale geskenk vir dié wat die fyner dinge in die lewe waardeer. Dit is toekomstige Africana en beslis 'n belegging, aangesien die eerste standaarduitgawe net 2 000 eksemplare beloop. Die boek is by die uitgewer en by vooraanstaande boekwinkels beskikbaar.

THE ABUNDANT HERDS — A celebration of the Nguni Cattle of the Zulu people — Marguerite Poland, David Hammond-Tooke, Leigh Voigt. Uitgewer: Fernwood Press Edms. (Bpk.), Posbus 15344, Vlaeberg 8018. Tel. 021 794 8686. Prys: R295.

5 Desember 2003