Nuwe skool vir vleisbeesproduksie

'n Seminaar waarby alle Suid-Afrikaanse vleisbeesboere by internasionale en plaaslike kenners kan leer wat die nuutste tegnologie, produksie- en markneigings, finansiële bestuurstelsels en mark- en verbruikersvoorkeure is wat hul bedryf raak, word van 21 tot 23 Oktober vanjaar by Aldam, naby Ventersburg in die Vrystaat, aangebied.

Soortgelyke seminare wat in Australië en Amerika aangebied word, het binne 'n paar jaar so gewild geraak dat van hulle ses jaar vooruit vol bespreek is.

Die Aldam-skool vir Vleisbeesproduksie word deur Landbouweekblad, Breedplan SA en die Lewendehawe Registrerende Forum aangebied. Die ander borge is Pick 'n Pay, Eerste Nasionale Bank, Molatek, Rud-skale en Unistel.

Afgesien van die lesings deur kenners gaan praktiese lesings aangebied word oor die seleksie van diere wat die potensiaal het om die grootste moontlike wins in die boer se sak te sit.

'n Hoogtepunt sal wees wanneer slagosse op die hoef deur die kenners besigtig, beoordeel en bespreek en die karkasse later geëvalueer sal word.

Dit gaan vleisbeesboere, voerkraaleienaars en hul werksmense die geleentheid bied om skouers te skuur met mense uit die bedryf en gesamentlik na kwessies te luister wat 'n beduidende invloed op hul toekoms kan hê.

Dit is dan ook die hoofoogmerk van dié seminaar: Om strategieë te voorsien wat geleenthede in al die stadiums van die produksieketting sal optimaliseer, van die speenkalfvoorsieners en stoettelers tot by die verwante bedrywe aan die einde van die ketting.

Volgens die program sal die volgende onderwerpe in die verskillende sessies bespreek word: