Groot kommer bestaan binne die Melkprodusente-organisasie (MPO) oor die daling in die aantal melkboere in Suid-Afrika.

Die organisasie se statistiek dui aan dat sowat 2 200 melkboere tans melk vir plaaslike verbruik lewer. Dr. Koos Coetzee, die organisasie se senior ekonoom, het op 19 September verlede jaar aan Landbou.com gesê die aantal melkboere het toe op 2 630 gestaan.
 
Die afgelope week het Coetzee aan Landbou.com bevestig dié getal is nou sowat 2 200. Dít verteenwoordig ’n verlaging van meer as 400 melkboere of sowat 16%. In 2010 het die land 2 713 melkboere gehad. Van 1997 tot 2010 het dié getal met sowat 4 000 verminder.
 
Hoë produksie
Mnr. Dean Kleynhans, voorsitter, sê die daling word deur baie betrokkenes “afgemaak” omdat melkproduksie in die land terselfdertyd styg. “Maar wanneer bereik ons die punt waar produksie nie kan byhou met die daling in produsente nie? Dit is nie ’n volhoubare situasie nie.”
 
Die vlakke waarop die rand nou teenoor die dollar en ander internasionale geldeenhede beweeg, is volgens Kleynhans ’n aanduiding dat suiwelinvoer nie vir altyd sal kan voortgaan soos wat tans die geval is nie. “Dit sal lei tot ’n groter fokus op plaaslike produksie, en dan is die boere minder.”
 
’n Eerste
Produksiestatistiek vir September vanjaar is laer as produksiesyfers vir dieselfde maand verlede jaar. Kleynhans sê dit is die eerste keer dat dié syfer jaar op jaar daal, en dis ’n teken “dat melkboere ongelooflik swaar trek”.
 
Kleynhans voorsien ’n krisis in die suiwelbedryf op die lang duur. Hy sê verbruik in Suid-Afrika en Afrika neem dramaties toe, maar ’n gesamentlike toekomsvisie vir die bedryf bestaan nie. “Elkeen gaan maar so op sy eie aan, maar die gebrek aan ’n langtermyn-strategie vir die bedryf is ’n reuse-tekortkoming, en dis ’n ernstige probleem.”