Santa Gertrudis wen prestasietoetsklas

'n Santa Gertrudis-bul is vanjaar se wenner van die gesogte
spesiale prestasie-toetsklas wat elke jaar een van die hoogtepunte van die
Internasionale Pretoria-skou se landbou-afdeling is.

Die spesiale toetsklas vir fase C-bulle is vir die 25ste keer tydens die Internasionale Pretoria-skou aangebied, vanjaar weer onder leiding van Vleissentraal en die Landbounavorsingsraad (LNR). Die doel is om prestasietoetsing in perspektief te plaas en onder toonaangewende telers te bevorder, en ook om die korrekte gebruik van prestasietoetsdata in die skouring te bevorder.

Veranderings is deur die jare aan die toelatingsvereistes aangebring om tred met die tyd te hou. Sedert 1998 kom bulle met goue én silwer merietes in aanmerking hiervoor, op voorwaarde dat hulle bogemiddelde indekse vir gemiddelde daaglikse gewigstoename (GDT), voeromsetverhouding (VOV) en speengewig het. Slegs een bul per ras mag ingeskryf word, wat deur elke deelnemende rasgenootskap benoem word.

Die bulle word op die dag van die prestasietoetsklas visueel ten opsigte van funksionele doeltreffendheid en voorkoms beoordeel, en die wenner word dan aangewys.

Vanjaar se wenner, Santapine Selby SP0140, behoort aan mnr. Pip Hobson van Hobson en Seun, Ladybrand. Dié bul het 'n speenindeks van 107. Sy gemiddelde daaglikse gewigstoename gedurende die fase C-toets was 2 237 g en die voeromsetverhouding was 5,16.

Bulle van dertien beesrasse het vanjaar aan die prestasietoetsklas deelgeneem. Dié bulle, met elkeen se nommer, eienaar, geboortedatum en toetssentrum, is die volgende:

* Brangus (V010117), Ferdinand Naudé Trust, Welkom, 24 November 2001, Welkom.

* Braunvieh (DP010019), mnr. W.P. du Plessis, Warrenton, 5 November 2001, Vryburg.

* Charolais (ACA010060), mnr. A.A. Smit, Makwassie, 30 Oktober 2001, Vryburg.

* Drakensberger (GR010004), mnr. G.W. Roux, Ventersburg, 4 Februarie 2001, Sernick.

* Gelbvieh (ANS010068), Ansoria Stoetery, Klerksdorp, 10 Oktober 2001, Vryburg.

* Hereford (FJN010028), mnr. F.J. en me. N. de Klerk, Migdol, 24 Augustus 2001, Vryburg.

* Limousin (MEY010037), mnr. G.T. Meyer, Amalia, 11 September 2001, Vryburg.

* Pinzgauer (PGJ010032), mnr. G.J. Rossouw, Bothaville, 25 November 2001, Glen.

* Romagnola (AB010005), mnr. A. Balocco, Hekpoort, 25 Mei 2001, Irene.

* SA Angus (RR010128), mnr. R.S.J. van Rensburg, Standerton, 7 Julie 2001, Irene.

* Santa Gertrudis (SP0140), mnr. G.E.G. Hobson en Seun, Ladybrand, 25 Mei 2001, Glen.

* South Devon (TNJ010197), mnr. T. Nieuwoudt, Schweizer-Reneke; 26 September 2001, Vryburg.

* Sussex (AW010020), Albert Whitfield Trust, Viljoenskroon; 27 Augustus 2001, Viljoenskroon.

10 Oktober 2003