Nuwe grasmengsel vir skape

Verbeter jou skape se kondisie met dié grasmengsel.

’n Nuwe grasmengsel, wat boere in staat sal stel om hul skape se kondisie te verbeter, is bekend gestel. 

Luidens ’n verklaring kan Advance Seed se Sheep Blend-grasmengsel boere in die sentrale, oostelike en westelike dele van die land help om die kondisie van hul skape te verbeter deur die voedingswaarde van weiding op te stoot.

Die mengsel bestaan uit vier inheemse weidingsgrasse wat vermeng is met ’n peulgewas. Die verskillende klimatologiese toestande in die sentrale, oostelike en westelike dele van die land is in die ontwikkeling daarvan in ag geneem.

Aanplanting
Die mengsel is geskik vir aanplanting op droëland of onder besproeiing. Die beste resultaat word verkry wanneer dit tussen September en Maart geplant word. ’n Subtropiese klimaat, met minstens 400 mm reën per jaar, is geskik vir dié mengsel.

“Die aanbevole saaidigtheid in rye, en breedwerpig gesaai, is 10 kg/ha. In die westelike dele van die land kan dit aangeplant word op plekke waar dit minder as 400 mm per jaar reën en aanvullende besproeiing nie moontlik is nie. Vrugbare kleileemgrond word verkies,” lui die verklaring.

Die mengsel is met  Agricote-saadbedekking bedek en dit bevat voedingstowwe en groeistimulante.

7 Februarie 2012