Ooraanbod druk lamspryse af

Lamsvleis se prys het ietwat gedaal.

’n Tydelike ooraanbod van lamsvleis het tot ’n daling in pryse aan boere gelei, en verbruikers moet hieruit munt slaan, sê die Rooivleisprodusente-organisasie (RPO).

Luidens die organisasie se nuusbrief het die produsenteprys van lamsvleis gedaal met 17,5%, van R57 per kilogram tot R47 per kilogram.

Mnr. John Durr, voorsitter van die Wes-Kaapse Rooivleisprodusente-organisasie, sê verbruikers moet nou daarop aandring dat dié laer pryse aan hulle deurgegee word, wat beteken dat hulle 17% minder vir lamsvleis moet betaal.

Ooraanbod
Volgens Durr is die tydelike ooraanbod veroorsaak deur veral boere in die Swartland en die Weskus wat lammers om twee redes in die mark sit: Eerstens omdat die weiding in dié gebiede besig is om swakker te raak en tweedens omdat die boere die lammers voor die begin van die oestyd wil bemark.

Die weiding in dié distrikte was die afgelope jaar geil, en die lammers is baie swaar. Durr sê die oorvloed van lamsvleis behoort egter nie te lank te hou nie, en die prys kan na verwagting binnekort begin styg.

‘Goedkoper’
Durr waarsku verbruikers om nie om die bos gelei te word met aanbiedings van “goedkoper” lamsvleis nie. ’n Verbruiker moet let op die gradering van die vleis wat hulle wil koop.

Graad A1, A2 en A3 is die gesogte vleis wat minder vet het en gewoonlik duurder is. Graad A4, A5 en A6 bevat meer vet en dit raak al hoe minder gewild onder verbruikers wat meer gesondheidsbewus raak.

7 Desember 2011