Skaapvleis onder die loep

Vleisskape. Foto: THEUNS BOTHA

Verteenwoordigers van 20 lande het in Brussel, België byeengekom om die afname in die produksie van skaapvleis en die dalende verbruik van dié soort vleis te bespreek. Die Internasionale Skaapvleisforum meen nuwe skaapvleisprodukte moet ontwikkel word en internasionale samewerking in navorsing en ontwikkeling moet verbeter om die winsgewendheid van skaapboerdery te steun.

Die forum voer aan die afname in die verbruik van skaapvleis en die stygende produksiekoste het tot ’n wêreldwye daling in inkomste en winsgewendheid in dié bedryf gelei. Dit ’n afname in die aantal skape in die wêreld tot gevolg het. Mnr Pekka Pesonen, voorsitter van die forum, sê ’n tekort aan stappe om dié kwessie aan te pak, sal ’n verdere daling in skaapgetalle veroorsaak.

Die forum het saamgestem dat die gehalte van produkte en die algemene produksie in die skaapbedryf sal verbeter met beter samewerking tussen betrokkenes in die verskaffingsketting. Wat verbruik betref, meen die forum dat die jonger geslag betrek moet word, veral wat kitskos betref.

Me. Mariann Fischer Boel, die Europese Unie se landboukommissaris, sê haar organisasie ontvang nie veel versoeke vir die geldelike steun van skaapvleisbemarking nie. “Daar is moontlikhede hier,” sê sy. Die voordele van skaapboerdery ten opsigte van klimaatsverandering is ook bespreek.

14 Oktober 2009