Slenkdalkoors sprei tentakels

Ent teen Slenkdalkoors. Foto: THEUNS BOTHA

Ses mense is reeds dood aan Slenkdalkoors, terwyl infeksies onder mens en dier toeneem.

Ses mense het reeds aan Slenkdalkoors gesterf, terwyl die aantal infeksies tans op 87 staan, sê die Departement van Gesondheid. Luidens ‘n berig op News24.com het dié sterftes in die Vrystaat en Noord-Kaap voorgekom.

In die Oos-Kaap is vier bevestigde gevalle van Slenkdalkoors by mense aangemeld en ‘n verdere tien mense is tans onder waarneming vir die siekte. Geen sterftes is in dié provinsie aangemeld nie, sê dr. Jane Pistorius, bestuurder van veeartsenydienste in dié provinsie.

Me. Charity Bhengu, woordvoerder vir die Departement van Gesondheid, sê in die Vrystaat staan die aantal besmettings tans op 68, terwyl vier mense in die provinsie aan die siekte dood is. “Elf gevalle is in die Noord-Kaap aangemeld en twee sterftes, en een in Noordwes”.

Dit is meestal boere, veeartse en plaaswerkers wat die siekte opdoen. Bhengu sê hulle wag op uitslae van nog vermoedelike infeksies.

Mnr. Boitumelo Tshwene, die LUR vir landbou in Noordwes, doen ‘n beroep op boere om die nodige beskermende kleding aan te trek, en aan hulle plaaswerkers te voorsien, wanneer daar met vermoedelik geïnfekteerde vee of karkasse gewerk word.

Op 15 plase
In die Oos-Kaap kom Slenkdalkoors op 15 plase voor, terwyl meer as 20 ander onbevestigde uitbrekings onder diere in die Middelburg- en Hofmeyr-distrikte ondersoek word. Sowat 210 skape en een bees het reeds aan die siekte gevrek. Meer as 14 200 skape, 2 000 beeste en 1 192 bokke is reeds op plase waar dit voorkom en meente in die nabyheid van uitbrake, ingeënt.

Mnr. Cerneels Pietersen, voorsitter van Agri Oos-Kaap, het ‘n beroep op boere gedoen om nie vee onnodig rond te skuif nie.

Volgens Mnr. Petrus de Wet, nasionale voorsitter van die NWKV, dui ‘n impakstudie van dié organisasie daarop dat tussen R50 miljoen en R80 miljoen se wol uit die besmette distrikte nog dié seisoen bemark moet word. “Ondanks die feit dat China se ontrekking van die mark op die betrokke wol minder mededinging op die veilings beteken, is daar nog ander lande wat die wol koop.”

Pistorius het ‘n ernstige beroep op veeboere in die Oos-Kaap gedoen om skape, bokke en beeste wat nie dragtig is nie gedurende die volgende paar maande voorkomend in te ent, aangesien ‘n wesentlike gevaar bestaan dat dit in die volgende seisoen verder kan versprei. Sy sê voldoende lewende entstof is beskikbaar.

7 April 2010