Wolskeersels bekyk vir foute

Wolbale. Foto: ONA VILJOEN

Om te verseker dat Suid-Afrika sy reputasie as ’n goeie geklasseerde skeersel behou, monitor Cape Wools nou skeersels wat by makelaars ontvang word om probleme te identifiseer.

Indien klasseeringsfoute in ’n skeersel opgemerk word, sal Cape Wools se waardeerder, Jakes Mulder, dit onder die aandag van die betrokke produsent bring om toekomstige foute te vermy. Dié stap volg ná ’n versoek van kopers en uitvoerders wat bekommerd is oor die agteruitgang van wolklassering.

Een van die grootste klagtes is dat produsente verskillende lengtes wol saam verpak, wat kopers noodsaak om goedkoper vir sulke skeersels te betaal of selfs af te keur. Té groot variasies in die lengte van wol het ’n nadelige uitwerking op die spindoeltreffendheid en die gehalte van die gare.

’n Ander probleem is die besoedeling van skeersels met allerlei vreemde voorwerpe, soos baaltou, wat dui op swak toesig in die skeerhok. Bevlekte wol veroorsaak ook probleme. Produsente wat hul skape met verf, teer en olie merk, kan groot finansiële verliese vir die verwerker veroorsaak omdat sulke merkmiddels nie uitwas nie. Verwerkers wys daarop dat net een baal bevlekte wol ’n hele verwerkingslot kan bederf.

’n Verwerkingslot word volgens streng spesifikasies vir ’n bepaalde eindproduk saamgestel deur 150 tot 300 bale uit verskillende skeersels saam te vermeng.

Net kleurstowwe wat uitwasbaar is, moet vir die merk van bale gebruik word. Sulke middels is kommersieel beskikbaar. Daar is ook merkpenne beskikbaar wat gebruik kan word om skape op die neus te merk. Geen ander middels wat die wol permanent kan vlek, moet gebruik word nie.

Boere word weer eens versoek om wol wat met teer, olie, verf, urine, mis of enige ander nie-uitwasbare middel bevlek is, voor skeer te verwyder, apart te verpak en as “Brands” te merk.

Die regulasies vir die klasering en verpakking van wol, die Suid-Afrikaanse Klasstandaarde, is op Cape Wools se webwerf by www.capewools.co.za beskikbaar.

26 Oktober 2009