Luidens ’n mediaverklaring is nuwe riglyne vir dié kode op  ’n vergadering van die Wêreldorganisasie vir Dieregesondheid (OIE) in Parys, Frankryk, goedgekeur. Dié nuwe kode behoort binnekort bekend gemaak te word.

“Die nuwe riglyne sal lande wat deur uitbrekings van Afrika-perdesiekte geraak word, se vermoë om hul perde uit te voer, op groot skaal verbeter; iets waaroor Suid-Afrika al vir  ’n  paar jaar onderhandel,” lui die verklaring. Die veranderinge sal beteken dat Suid-Afrika se se beheermaatreëls vir dié siekte wêreldwyd erken sal word.

Trots
Die departement sê hy is baie trots op die werk wat departementele amptenare, die Suid-Afrikaanse perdebedryf en die Universiteit van Pretoria (UP) gedoen het om tot dié veranderde kode by te dra.

Dr. Botlhe Modisane, ’n veearts verbonde aan die departement, is vir  ’n termyn van drie jaar tot die raad van die OIE verkies.

Mnr. Pieter Gibson, hoof uitvoerende beampte van Racing South Africa, sê dié stap is  ’n deurbraak vir die land, wat deur die vorige reëls aan bande gelê is terwyl dit nie die werklike risiko van die virus in ag geneem het nie.

Die vergadering is deur 600 afgevaardigdes van regoor die wêreld bygewoon.