Sedert die Rooivleisbedryfsforum verlede jaar met die protefeuljekomitee vir landbou, bosbou en visserye vergader het oor die land se bek-en-klouseer-status en die impak daarvan op uitvoer, het die forum nog geen terugvoering van die departement ontvang nie. Mnr. Tim Davidson, voorsitter van die forum se nakomingskomitee, sê hulle het derhalwe besluit om hulle nou op Adjunkpres. Kgalema Motlanthe te beroep.
 
Davidson het op die 24ste kongres van die Rooivleisprodusente-organisasie (RPO), wat op die Rawdons-landgoed in KwaZulu-Natal gehou word, gesê: “Ons gaan die verval van die Departement van Landbou, Bosbou en Visserye rapporteer.”
 
Hy sê die departement se optrede benadeel nie net die landboubedryf nie, maar dit bring ook die gesondheid en welstand van die Suid-Afrikaanse verbruiker in gedrang.
 
Onbevoegdheid
’n Voorbeeld van onbevoegdheid wat Davidson uitgewys het, was ’n verandering aan ’n wet wat deurgevoer is sonder dat ’n openbare raadplegingsproses enigsins gevolg is. Dié verandering was aan ’n regulasie dat ’n boer wie se vee weens die voorkoms van ’n aansteeklike siekte van kant gemaak moes word, teen markwaarde vir sy verlore vee vergoed moes word.
 
Die regulasie is verander dat die Direkteur-generaal van die departement moet bepaal hoeveel so ’n boer vergoed mag word. Davidson sê hulle wag tans op terugvoering van die departement en die portefeuljekomitee oor die veranderinge.
 
Hou Landbouweekblad dop vir meer voorbeelde wat Davidson uitgewys het.