’n Groep wat in staat sal wees om verskeie klein groepe of verenigings van perdetelers te monitor, is onlangs deur die Registrateur vir Diereverbetering aanvaar.

Me. Frances Cheboub, teelbestuurder van die Suid-Afrikaanse Warmbloedperd-vereniging (SAWHS), sê die Suid-Afrikaanse Federasie vir Perdtelersverenigings (SAFHBS) sal dieselfde diens ten opsigte van perde verrig as wat Stamboek Suid-Afrika ten opsigte van vee verrig.
 
Volgens Cheboub moes perde nog altyd by Stamboek SA geregistreer word, maar weens die unieke behoeftes van perde vergeleke met vee het, het hulle drie jaar gelede ’n versoek daaroor aan die Registrateur gerig. “Ons het nog altyd gesukkel met registrasie by Stamboek SA, want teelperde het nie dieselfde klassifikasies as produksiediere soos vee nie.”
 
Sodra die federasie ’n grondwet aanvaar en aan ander regulasies voldoen het, sal dit van diens kan wees.
 
Nie mededinger
Cheboub sê die federasie wil nie met SA Stamboek meeding nie. “Ons wil net ’n diens lewer aan telers van warmbloedperde. Telers sal dus ’n keuse hê van watter registrasie-owerheid hulle verkies.
 
“Ons hoop dat hierdie nuwe inisiatief ’n beter diens sal aanbied om in die behoeftes van perdetelers rakende die aanteken van en insameling van data te voorsien,” aldus Cheboub.

Die stigtersorganisasies van die federasie is: Lipizzaner Suid-Afrika, die Suid-Afrikaanse Ierse Sportperd-vereniging, die Suid-Afrikaanse Hanover-telersvereniging, die Suid-Afrikaanse Oldenburg-telersvereniging, Knapstrupper Suid-Afrika, die Suid-Afrikaanse Warmbloedperd-vereniging en die Suid-Afrikaanse Warmbloedponie-vereniging.