Erken die uitwerking wat klimaatsverandering op die landbou het en die rol wat boere kan speel om dit aan te pak, vra Agri SA.

Luidens ’n nuusverklaring sê mnr. Johannes Möller, voorsitter van die organisasie: “Boere is die sleutel om dienste te verskaf wat vir lewe nodig is, soos voedsel, voer, vesel, energie en die ekostelsel.”

Hy sê hulle het onderhandelaars by COP17 daaraan herinner dat boere daagliks met die omgewing omgaan. Boere is derhalwe in die ideale posisie om landboupraktyke, wat kan help om by klimaatsverandering aan te pas en dit te probeer beperk, toe te pas.

Anders
Möller sê die landbou is anders as ander sektore, derhalwe moet dit van ander sektore gedistansieer word. Die meeste van die landbou se vrystelling van kweekhuisgasse kan regstreeks aan natuurlike biogas-siklusse verbind word.

“Boere kan nie verantwoordelik gehou word vir vrystellings wat ’n gevolg is van biologiese prosesse nie, veral nie omdat laasgenoemde nodig is vir voedselsekerheid nie.”
                                                                                            
Hy sê ook dit is moeilik om met ander sektore ten opsigte van kostedoeltreffendheid met die vrystelling van kweekhuisgasse mee te ding as geldelike aansporing nie ingestel word nie. Verskeie studies het reeds bewys dat die beperking van kweekhuisgasse deur die landbou vinnig en kostedoeltreffend kan plaasvind. 

Möller sê deur boere vir koolstofbeperking te vergoed, sal die landbou se koolstofopbergingspotensiaal verbeter.

Vyf stappe
Om die posisie waarin die landbou homself tans bevind aan te pak en dié sektor deel te maak van die toekomstige proses, vra die organisasie dat vyf spesifieke stappe gevolg word:

- Gee amptelike erkenning aan die landbou as ’n sektor wat grootliks deur klimaatsverandering geraak word, terwyl dit terselfdertyd ’n groot rol in aanpassing en voorkoming kan speel.

- ’n Verbintenis tot ’n aansienlike toename in belegging in en ondersteuning vir die landbou.

- Erkenning van die bepaalde karaktereienskappe en behoeftes van die landbou in ’n toekomstige ooreenkoms.

- Die daarstelling van finansiële meganismes om boere te vergoed vir koolstofopberging en omgewingsvriendelike landboupraktyke.

- Erkenning van boere-organisasies as vennote wat boeregemeenskappe en die internasionale koolstofmark met mekaar verbind.

7 Desember 2011