Sluittoestel fnuik diewe

Mnr. Bertus van der Linden wys hoe hy boorgate sluit om sy dompelpompe teen diefstal te beskerm.

Die blatante diefstal van sy vrag-motors se noodwiele het mnr. Bertus van der Linden reeds jare gelede genoop om 'n sluittoestel te ontwerp en te patenteer wat selfs ervare noodwieldiewe kon kortwiek.

Van der Linden se sluittoestel was nou wel doeltreffend om sy vragmotors se noodwiele te beskerm, maar sedert hy die langpad vaarwel toegeroep het en hom op Gunyula, naby Letaba in die provinsie Limpopo, kom vestig het, het hy hom in nóg nuwe euwels vasgeloop, naamlik die diefstal van voertuigbatterye en dompelpompe.

Die basiese beginsels van die sluittoestel vir noodwiele is ingespan vir die planne waarmee batterye en dompelpompe be-skerm kon word. Die sluittoestel vir batterye bestaan uit 'n klampstelsel wat aan 'n voertuig vasgebout word. Dit maak voorsiening vir verskillende groottes batterye omdat die hoogte en die wydte verstelbaar is. Om te verhoed dat boosdoeners die stelsel losbout, word die boutkoppe met twee staaldoppe of sperhulse bedek. Dié twee staaldoppe word met 'n lang bout aanmekaar vasgebout. 'n Hangslot deur die boutskag tussen twee keerstawe verhoed dat dit losgemaak kan word. Van der Linde sê die toestel waarmee 'n dompelpomp beskerm word, het ook heelwat dinkwerk geverg. Dié toestel bestaan uit verskeie onderdele.

Eerstens is daar 'n ronde ring met twee lang boute (16 mm x 250 mm elk) wat kan oopmaak om oor 'n pyp en ook binne-in 'n boorgatvoering te pas. Twee hakies aan skakels waarmee die ring aan die voering gehaak word, verhoed dat dit tydens die montering in die boorgat verdwyn. Twee gate word in die voering geboor en met die ring in posisie word staalboute (12 mm) met nylon-sluitmoere aan die binnekant in die gate vasgebout om te verhoed dat die ring boontoe uitgetrek kan word. 'n Standaard-dekplaat, met twee gate daarin geboor, word nou oor die twee lang boute geplaas en twee glypyp-passtukke word dan bo-oor die twee boute gepas.

'n Monteerplaat van 16 mm staal word nou oor die lang boute gepas en met sluitmoere vasgemaak. Twee staaldoppe word bo-oor die sluitmoere gepas en met 'n stewige skag aanmekaar en deur die vertikale sy van die monteerplaat gepas waar dit met 'n hangslot in 'n skermholte gesluit word.

Volgens Van der Linden is hierdie sluittoestelle van hom peutervry. Hy maak steeds sluittoestelle vir noodwiele van allerlei voertuie en sleepwaens asook swaardiensgrendels vir swaai- en skuifdeure.