Janse Van Rensburg het sy handplanter aangepas en in ‘n trekkermodel verander. Die eenvoudige ontwerp van die handplanter maak dit moontlik om die saad op ’n konstante diepte te plant.

Dié handplanter was op die afgelope Nampo-oesdag ’n wegholsukses. Bykans duisend van die handmodelle is al in die werkwinkel op sy plaas gemaak.

“Ek kry deesdae daagliks oproepe van boere wat my vra om vir hulle iets te ontwerp om hul werk op die plaas te vergemaklik,” sê hy. “Pampoenproduksie was egter my grootste probleem, want dit is nie so maklik nie.”
Janse van Rensburg het gou besef pampoenpitte is ’n perd van ’n ander kleur.

“Die Liewe Vader het dit só gemaak dat hulle nie saam in ’n bak gegooi wil word om een-een geselekteer te word nie.” Hy sê as ’n mens mooi na die pitte gaan kyk, sien jy die pitte van dieselfde kultivar verskil baie. Party pitte is die helfte kleiner as die ander.

Goeie plantspoed
“Ek het alle bestaande planters gaan uittoets. Terwyl die een pitte selekteer, plant die ander een weer twee of drie pitte op ’n slag. Ander planters breek weer die pitte te veel.” Uit gesprekke met pampoenboere het dit duidelik geblyk dat die saad net te duur raak om foute te kan bekostig. Die trekkermodel se plantspoed is sowat 5 km/h, wat neerkom op sowat 5 ha tot 6 ha p r dag.

Teen R6 500 (BTW uitgesluit) sal die planter homself sommer gou afbetaal indien die verminderde arbeidskoste en saadbesparing in ag geneem word. Die trekkerkombinasie met twee werkers vervang sowat 20 werkers wat pampoenpitte met die hand plant. Koop Landbouweekblad vir meer inligting oor die planter of kontak Janse van Rensburg by 073 454 4111.

Kyk hier na ‘n video van dié planter. Klik hier vir nog 'n video oor 'n oulike boereplan deur 'n boerseun van Vryheid.