Die internasionale saadmaatskappy, Monsanto, gaan die nuwe jaar binne met ’n rekordgetal biotegnologie-projekte wat binne die navorsings- en ontwikkelingspyplyn gevorder het. Onder die projekte is die eerste geneties gemodifiseerde (GM) produk wat ’n direkte voedsaamheidsvoordeel vir die verbruiker inhou.

“Ons het voorheen al gesê ons is op die randjie van ’n tegnologie-ontploffing en hierdie is die begin daarvan,” sê mnr. Robb Fraley, tegnologie-hoof. “Vanjaar sal die eerste van dié produkte wat die hele spel gaan verander, plase bereik. Dit is die eerste golf van nuwighede. Die projekte wat nou nog vroeg in die pyplyn is, sal die volgende golf van tegnologiese deurbrake aanvuur en sal toeneem in die jare wat kom.”

Hy meen die produkte gaan help om landbou-produktiwiteit en –winsgewendheid tot ’n nuwe vlak te neem. Daar is ook baie goeie vordering gemaak met nuwe produkte wat geneties aangepas is om hoër opbrengste te lewer en toestande soos droogte beter te hanteer.

In Suid-Afrika is daar veral opgewondenheid oor die vordering wat gemaak is met ‘n droogtebestande mielie.

14 Januarie 2010