Twee swaargewigte in die landboubedryf, NWK en Senwes, het ’n ooreenkoms vir ’n gesamentlike versekeringsonderneming aangegaan.

Luidens ’n verklaring is die samevoeging van NWK se versekeringsdiens en Senwes se versekeringsonderneming - Univision Financial Services – Maandag (2 April 2012) aangekondig.

Die transaksie is so gestruktureer dat albei maatskappye gelyke aandele in die onderneming besit. Mnr. Danie Marais, besturende direkteur van NWK, sê dit maak kommersieel sin om voordele van skaal te bewerkstellig omdat versekeringsdienste reeds aan produsente gelewer word.

“Voorts, omdat die twee besighede albei korttermyn-, langtermyn- en oesversekering bemark en hanteer, en met groot mededingers in die finansiële sektor meeding, kan wesenlike sinergie en besparings tot voordeel van alle belanghebbendes bewerkstellig word.”

Onmisbare komponent
Mnr. Francois Strydom, besturende direkteur van Senwes, sê versekeringsdienste is ’n onmisbare komponent van ’n landbou-onderneming:

“Hoewel die versekeringsbesigheid ’n kleiner rolspeler in ons besigheid is, is dit ’n onmisbare en kritieke deel van ’n landbouprodusent se portefeulje én risikobestuur, asook dié van sy finansierder, en ons wil deur hierdie samesmelting die klantebasis van meer mededingende en innoverende produkaanbiedings en premies te voorsien.”

Die transaksie gaan binnekort geimplementeer word want dit is nie onderhewig aan regulatoriese goedkeuring nie. Mnr. Daan Hugo is as besturende direkteur van die nuwe onderneming aangestel.

2 April 2012