Die verantwoordelike gebruik van geneties gemodifiseerde (GM) gewasse in Suid-Afrika is ’n kwessie wat die Departement van Landbou, Bosbou en Visserye ernstig opneem.

Na aanleiding van kritiek deur die Vereniging van Veevoervervaardigers (Afma) teen die departement sê die departement hy kan nie sy verantwoordelikheid rakende veilige voedsel vir mens en dier op die kantlyn skuif nie.
 
Die organisasie het verlede week volgens ’n verklaring aangedui dat die departement “onaanvaarbaar” stadig vorder met die registrasie van GM gewasse en die regulatoriese stelsel. Volgens Afma lei dít daartoe dat die land tans nie mielies van Argentinië, Brasilië en Amerika kan invoer nie. Kommer word uitgespreek oor hoe dié situasie die land se voedselpryse en gevolglik bestendigheid in gemeenskappe kan raak.
 
Die organisasie verwys in sy verklaring na die staat as masjinerie wat vir die bedryf moet werk, maar wat tans nie behoorlik werk nie.
 
Kommer
Luidens ’n verklaring sê die departement hy is bekommerd oor Afma se stellings, aangesien die departement moet optree binne die beperkings van die Wet op Geneties Gemanipuleerde Organismes (wet 15 van 1997).
 
In die verlede was Suid-Afrika en Amerika gesinkroniseer ten opsigte van die aantal GM-gewasse wat in dié lande toegelaat sou word. Dié situasie het intussen verander, en volgens die departement kan graaninvoer van lande wie se GM-bepalings van die plaaslike verskil, nie toegelaat word nie. Dié situasie het ook in Argentinië voorgekom, derhalwe is graaninvoer van Amerika en Argentinië gestaak.
 
Aansoek
Volgens die departement het hy die afgelope tien maande herhaaldelik aan Afma aangedui dat hy sy kommer aan tegnologie-ontwikkelaars moet rig, aangesien die goedkeuring van GM gewasse ’n sakebesluit van dié groepering is.
 
“In dié stadium kan die 'staatmasjienerie' wat AFMA as onvoldoende beskou nie veel doen nie, behalwe as ’n aansoek by die tegnologiese ontwikkelaars ingedien word vir die nagaan van die situasie wat die desinkronisasie tussen Argentinië en Suid-Afrika tot gevolg gehad het,” lui die verklaring.