Grootste windplaas kry teenstand

Turbines op 'n Hollandse plaas.

Alles dui daarop dat die omgewingsimpakstudie vir ’n beplande windplaas in Mpumalanga nog redelik wind van voor te wagte kan wees.

Gedeeltes van die plase Burgershoop en Elandspoort, sowat 35 kilometer noord-wes van Volksrust in Mpumalanga, is geoormerk vir, sover bekend, Suid-Afrika se grootste windplaas nóg. Volgens dokumente word beoog om 116 windturbines op die plaas van sowat 1 700 hektaar op te rig.

Benewens die windturbines, wat 126,5 meter hoog sal wees, is daar sprake van ’n subkragstasie met ’n vermoë van 11 kilowatt en laespanningkabels van 1 000 Volt.

Me. Caroline Holman van die plaas Weltevrede, ’n buurplaas van die beoogde windplaas, is erg omgekrap oor die manier waarop die betrokkenes ingelig is asook oor die geweldige nadelige invloed daarvan op die omgewing, die diere en die mense waarvan sy op die internet gelees het.

Sy sê volgens die internet beïnvloed die windturbines se geluide en magnetiese veld mense en diere beslis negatief. Dit lei tot glo onder meer tot hoofpyne, slaaploosheid, stress, uitputting, duiseligheid, depressie, oorsuisings, hartkwale, angsaanvalle en migraine. Die magnetiese veld veroorsaak versteurings vir mense, diere, vlermuise, visse en voëls.

Me. Isabel Hough van K2M Environmental (Pty.) Ltd. van Rustenburg in Noordwes doen die omgewingsimpakstudie vir die windplaas. Hough sê alle besware moet in aanmerking geneem word vir die impakstudie wat van 12 tot 18 maande kan duur om af te handel. Indien geen besware teen ’n projek aangeteken word nie, is dit redelik eenvoudig en word bloot ’n verslag geskryf en ingedien.
Wanneer besware aangeteken word, soos in hierdie geval, moet elke beswaar afsonderlik ondersoek word. Dit kan die omgewingsimpakstudie met ’n paar maande vertraag, sê Hough.

2 November 2009