Mis moontlik in krag omskep

Varkmis kan dalk gebruik word om krag op te wek. Foto: THEUNS BOTHA

Vark-, bees- en hoendermis kan gebruik word om krag op te wek en kan klimaatsverandering beperk, sê Farmsecure.

Luidens ’n berig op Sake24.com het die firma onder sy Farmsecure Carbon-afdeling met impakstudies vir sewe projekte landwyd begin. Die projekte fokus daarop om veemis asook biomassa in metaangas om te skakel wat vir kragopwekking of as ’n energiebron gebruik kan word.

Die firma het ’n portefeulje van 25 projekte wat op lang termyn tot 100 megawatt sal kan opwek.

Koolstofkrediete
Mnr. Rudi Kriese, uitvoerende hoof van die afdeling, sê die projekte gaan koolstofkrediete verdien soos bepaal in die Verenigde Nasies (VN) se skoon-ontwikkelingsmeganisme (CDM).

Dié meganisme laat groentegnologie-projekte in ontwikkelende lande toe om koolstofkrediete te verdien, wat hulle op die internasionale koolstofmarkte as CER’e (gesertifiseerde vrystellingsvermindering) kan verkoop.

Die projekte
Drie van die eerste klomp projekte is in die Wes-Kaap en dit sluit ’n vark- en beesboerdery naby Bonnievale, ’n melkboerdery naby Darling en ’n varkplaas by Klipheuwel in.

Volgens Kriese sal die ontwikkeling van elkeen van die projekte tussen R10 miljoen en R13 miljoen beloop.

Bron: Sake24.com

12 September 2011