Augustus is dalk die maand waarin die moratorium op lisensies vir binnelandse gas-eksplorasie gelig kan word, meen mnr. Jan Willem Eggink, hoofbestuurder van stroomop-werksaamhede van Shell Suid-Afrika.

Eggink het in Kaapstad gesê hy verneem in die media dat dié moratorium moontlik aanstons gelig kan word. Dit sal, volgens hom, die Regering in staat stel om hopelik teen die einde van die jaar eksplorasieregte vir hidrobreking toe te ken.

Indien Shell regte kan bekom om eksplorasie te doen, sal dit die volgende stap in dié internasionale rolspeler se soeke wees om skaliegas in die Karoo te ontgin. Maar, baie water moet nog in die see loop voordat dit moontlik is, sê Eggink. Ná die toekenning van lisensies moet omgewingsimpakstudies eers volg.

Miljoene dollar vir die projek
Eggink staan aan die hoof van Shell se projek om skaliegas in die Karoo te ontgin. Die maatskappy het sowat $200 miljoen Amrikaanse dollar vir dié projek geoormerk.

Eggink het al talle boere- en gemeenskapsgroepe oor Shell se voorgenome projek toegespreek. Volgens hom het die meeste mense met wie hy gesels het, ’n wanpersepsie oor hidrobreking en die gevolge daarvan. Hy sê Shell se internasionale reputasie is op die spel met die ontginning van skaliegas, sou dit in Suid-Afrika die groen lig kry. Die Karoo Aksiegroep opponneer enige hidrobreking in die Karoo.

Op ’n vraag of hy die wenk oor die moontlike opheffing van die moratorium van owerheidsweë verkry het, het Eggink gesê Shell het sy kontak met die staatsmasjinerie verbreek totdat die moratorium gelig word. Hy is terdeë daarvan bewus dat die Regering daarvan verdink word dat hy voorkeur-behandeling aan Shell bied.