Nuwe soekenjin vir boere

‘n Kragtige boere-soekenjin is die nuutste toevoeging tot Landbouweekblad se digitale stal.

BoerSoek is presies wat dit sê: ‘n Webwerf waar boere na landbou-goed kan soek en vind. Die doel van díe gratis webwerf is om ‘n omvattende aanlyn bron van produkte en dienste aan te bied.

Dié webwerf, www.boersoek.co.za, het ‘n kragtige soekfunksie wat die gebruiker op verskeie maniere kan benut om produkte, dienste of instansies aan te wys. Op die tuisblad word die 26 letters van die alfabet neffens mekaar vertoon en met ‘n klik van die muis op ‘n letter verskyn al die besighede wat daaronder gelys is. Gebruikers kan ook met trefwoorde soek, en soektogte kan verfyn word deur in provinsies te soek.

‘n Beskrywing van elke onderneming, plus kontakbesonderhede, soos e-pos-adresse, telefoonnommers en webwerwe, asook ‘n Google-kaart van die ligging, word per inskrywing vertoon. Webbesoekers kan ook kommentaar lewer by die gelyste ondernemings en punte vir goeie diens aan instansies toeken.

Tot dusver is meer as 8000 plaaslike ondernemings en instansies se besonderhede op BoerSoek gelaai, maar die proses gaan voort. Enigiemand in die landbou wat ‘n diens of produk het wat hy of sy op die webwerf wil laat vertoon, word aangemoedig om dit in te stuur vir gratis plasing. Meer besonderhede is op die webwerf www.BoerSoek.co.za beskikbaar.

9 Februarie 2012