Die staat het R18,6 miljoen bewillig aan ’n volhoubaarheidstudie vir ’n solarpark in Upington.

Luidens ’n berig op Engineering News het me. Dipuo Peters, die Minister van Energie, Dinsdag (7 Junie) in die Parlement gesê die projek sal voorrang geniet sodat so spoedig moontlik daarmee voortgegaan kan word.

Die studie behoort teen einde Julie afgehandel te wees. Na verwagting sal die park sowat 5 000 megawatt se hernubare krag produseer. Die Departement van Energie het die Fluor Corporation-groep aangestel om die studie te doen.

Die park kan ’n totale belegging van $20 miljard (R140 miljard) vir die provinsie beteken.

9,4%-aandeel teen 2030
Volgens die land se geïntegreerde hulpbronplan word  verwag dat sowat 9,4% of 8400 megawatt van die land se krag teen 2030 van solarparke afkomstig sal wees, met sowat 16% of 9 200 megawatt se krag wat van wind-energie afkomstig sal wees.

“Ons is opgewonde dat Suid-Afrika kan begin om die moontlikheid van solartegnologie ernstiger kan bestudeer, en as deel van ons groter energiemengsel kan benut wat op ’n manier ons energie se koolsuurinhoud sal verlaag,” aldus Peters.

’n Solarpark-owerheid sal ook op die been gebring word, en hoofstroom-infrastruktuur, soos water, krag en vervoer, sal aan verskillende projekontwikkelaars verskaf word.

Bron: Engineering News

9 Junie 2011