Dié beesboer, mnr. Will Wilson van die staat Queensland, se aanvanklike kommentaar oor sy vrou, Katie, se nuwe iPhone was eintlik nie mooi is.

“Drie dae later was ek skoon verras om te sien hoe hy op Google soek om ‘n toep (app) te maak “ vertel Katie. “Binne ‘n week het hy via Google uitgevind hoe werk die proses om ‘n iApp te ontwikkel en vry te stel.”

Dit was 'n jaar gelede. Will het in sy Google-soektogte op Rick Hoy van die nabygeleё IT-maatskappy MandraIT afgekom, en saam het hulle iHerd, 'n nuwe gratis toep vir veeboere, ontwikkel en vrygestel. Hulle het dit op die afgelope Beef Australia, die groot beesvleis-ekspo in Rockhampton, Queensland, bekendgestel.

Werk ewe goed vir 10 of 10 000 beeste
“Wat dit so oulik maak, is dat dit nie saak maak of jy tien of 10 000 beeste het, dit werk ewe goed,” sê die Wilsons, wat suid van Rockhampton met twee stoeterye Brahmane en Herefords en 'n kruiskudde tussen die twee rasse boer.

Dit behoort ook net so goed in ‘n Suid-Afrikaanse as in ‘n Australiese veeboerdery te werk, meen hulle.

'n Totale veeboerdery se bestuur kan met iHerd bedryf word, van voorraadbestuur van dieregesondheidmiddels tot rekordhouding van watter diere waar loop, watter diere wanneer behandel is, en van geboortes, aankope en vrektes, sê Hoy.

Boere wat net kommersieel boer, kan die stoet-funksie afskakel. Volgens Wilson spaar dit hom sowat 12 ure se werk per maand.

Sedertdien is hy so beїndruk met wat 'n iPhone kan doen, dat sy hele gesin nou met Apple-produkte toegerus is – van iPhones tot iPads en Apple-skootrekenaars vir die kinders, vir wie Katie op die plaas tuisonderrig gee.