Windplase kan paaie benadeel

Die oprigting van windplase kan 'n nadelige effek op paaie hê. Foto: VERSKAF

Die oprigting van windplase in Suid-Afrika teen 2015 kan erge stremming op Suid-Afrikaanse paaie plaas, waarsku ’n omgewingsorganisasie.

Luidens ’n berig op Engineering News (29 September 2011) sal die plase na verwagting 1 850 megawatt krag opwek, en volgens die GreenCape-inisiatief beteken dit dat 925 windturbines na die plase vervoer sal moet word.

Elke turbine gaan in sewe komponente vervoer moet word (groter turbines sal moontlik agt komponente insluit).

Mnr. Sisa James, ’n verteenwoordiger van die GreenCape-inisiatief, het op ’n kongres van die Suid-Afrikaanse Wind-energievereniging gesê dit sal beteken dat  6 475 abnormale vragte tussen hawens en die aanlegte op Suid-Afrika se paaie sal moet beweeg.

“Oor ’n tydperk van twee jaar kan dit tot 13 abnormale vragte per dag beteken, mits die vragte gelyk opgedeel word,” lui die berig. James sê dít is egter hoogs onwaarskynlik omdat turbines nie noodwendig in Suid-Afrika sal aankom op die dag wat die oprigtingsprojekte onderneem word nie.

Abnormale vragte
Volgens James sal dié abnormale vragte implikasies vir die hele vervoerstelsel inhou wat die lengte, hoogte en breedte van komponente betref.

“Hierdie tipe vragte en die volumes wat ons verwag, sal erge stremming op ons padnetwerke plaas, en die nodige infrastruktuur is nie daar nie.”

Veranderinge sal langs sommige roetes aangebring moet word, wat die skuif van padtekens en heinings langs paaie gaan insluit. Sowat 112 verkeersbeamptes sal ook benodig word om dié vragte te vergesel, en die roetes sal vooraf spesiaal geadverteer moet word.

’n Vragmotortekort kan ook moontlik ontstaan omdat die land nog nooit vantevore so ’n projek onderneem het nie. Dienooreenkomstig kan ’n tekort aan hyskrane ook ontstaan.

James meen dat Transnet, met spoorvervoer, een van die beste oplossings vir dié probleme asook kostedoeltreffende vervoer bied, maar dié semi-staatsinstelling het nie toegang tot die nodige infrastruktuur wat daarvoor benodig word nie.

Bron: Engineering News

29 September 2011