Hoekom druiwe verbruin

Die rypheid van tafeldruiwe wanneer dit geoes word en die soort sakkie waarin dit opgeberg word, speel 'n rol in die voorkoms van verbruining, blyk uit navorsing.

Die voorkoms en kleur van vrugte is belangrik vir die verbruiker. Dit is welbekend dat kleur 'n bepalende rol speel in die besluit van 'n verbruiker of hy of sy 'n produk gaan koop of nie.

Een van die probleme waarmee tafeldruifprodusente in Suid-Afrika soms sukkel, is die verbruining van korrels.

Mnr. Dirk Burger, 'n navorser by ExperiCo, 'n instansie op Stellenbosch wat navorsing doen oor verskillende aspekte van vrugte, sê die kleur van tafeldruiwe word beïnvloed deur natuurlike pigmente in die vrug — soos chlorofil, karotenoïede en antosianiene — óf deur pigmente wat ontstaan weens ensiematiese verbruiningsreaksies. Ensiematiese verbruining is een van die belangrikste kleurreaksies wat vrugte, groente en seekos se gehalte beïnvloed. Die ensiem polifenoloksidase is die oorsaak.

Burger het op 'n tafel- en droogdruif-werkswinkel wat deur die SA Wingerd- en Wynvereniging (SAWWV) op Upington aangebied is, gesê ensiematiese verbruining benadeel die meeste vars produkte, maar dit is tog voordelig vir sekere ander kommoditeite, soos tee, koffie en kakao. Die aantreklike kleur van sekere gedroogde vrugte, soos rosyne, pruimedante en dadels, is afhanklik van ensiematiese verbruining.

In die tafeldruifbedryf veroorsaak ensiematiese verbruining by sekere wit kultivars jaarliks groot finansiële verliese deurdat dit die voorkoms van die produk benadeel. Vanjaar het verbruining by die inhoud van sowat 5 % tot 10 % van die totale uitvoerkartonne van die kultivars Majestic, Regal Seedless en Victoria voorgekom.

Omdat dit so 'n ernstige probleem in die tafeldruifbedryf is, is dit deeglik ondersoek om te bepaal wat die voorkoms van verbruining by Majestic en Regal Seedless beïnvloed.

Burger sê by Majestic kom oppervlakkige ('n netagtige patroon) sowel as interne verbruining voor. Laasgenoemde lei tot die grootste geldelike verliese. By Regal Seedless kom oppervlakkige ('n vlekagtige patroon) sowel as interne verbruining voor. Hier is eersgenoemde die grootste probleem.

Verskeie naoes-faktore is oor die laaste twee jaar ondersoek vir hul invloed op verbruining by Majestic en Regal Seedless.

Verskillende geperforeerde sakke is met ongeperforeerde sakke vergelyk om hul invloed op verbruining by Regal Seedless-druiwe te bepaal. In proewe waar druiwe vir hul protokol-tydperk opgeberg is, het geperforeerde sakke in die meeste gevalle die oppervlakkige verbruining beduidend verhoog in vergelyking met die ongeperforeerde sakke.

Soortgelyke resultate is oor twee seisoene verkry. Hoe groter die perforasies hoe meer die oppervlakkige verbruining, lyk na 'n riglyn. Semi-kommersiële proewe met soortgelyke sakkies, waar die druiwe met aankoms oorsee ondersoek is, het nie altyd die verskille tussen die verskillende soorte sakkies getoon nie. Dit kan toegeskryf word aan 'n korter opbergtydperk as die protokol-tydperke wat in die proewe gebruik is.

Oesrypheid het 'n betekenisvolle effek gehad op die voorkoms van interne verbruining by Majestic en van oppervlakkige verbruining by Regal Seedless. Dit lyk of oesrypheid 'n teenoorgestelde effek het op die voorkoms van interne verbruining teenoor oppervlakkige verbruining. Interne verbruining by Majestic het betekenisvol afgeneem met 'n toename in oesrypheid. Daarteenoor het oppervlakkige verbruining by Regal Seedless betekenisvol toegeneem met 'n toename in oesrypheid.

Die grootte van die drag (10 trosse per stok teenoor 20 en 30 trosse) het geen betekenisvolle effek gehad op die voorkoms van verbruining by Regal Seedless nie.

Burger sê van ál die faktore wat ondersoek is, blyk dit dat oesrypheid en die soort sak wat gebruik word die grootste effek gehad het op die voorkoms van oppervlakkige vlekagtige verbruining by Regal Seedless, en oesrypheid het die betekenisvolste effek gehad op die voorkoms van interne verbruining by Majestic.

Temperatuur se rol bekyk

Majestic-druiwe wat in die oggend teen 'n temperatuur van 18,9 °C geoes is, het nie betekenisvol meer of minder verbruin as dié wat in die middag teen 30,7 °C geoes is nie. Oppervlakkige en interne verbruining het min voorgekom by die druiwe wat getoets is, en oestemperatuur het geen invloed op die ontwikkeling van verbruining gehad nie.

Majestic-druiwe wat onmiddellik ná verpakking verkoel is, het nie betekenisvol meer of minder verbruin as druiwe wat eers drie en ses uur ná verpakking verkoel is nie. By druiwe wat getoets is, was die vlakke van oppervlakkige netagtige verbruining hoog en die voorkoms van interne verbruining baie laag, maar verskillende vertragingstydperke voor verkoeling het geen effek gehad op die ontwikkeling van verbruining nie.

Majestic, wat afgekoel is met lug van -3 °C wat daaroor geblaas is, is vergelyk met Majestic, afgekoel met lug wat teen 0 °C daaroor geblaas is. Die verskillende tempo van verkoeling het geen betekenisvolle effek op die voorkoms van verbruining by Majestic-druiwe gehad nie. Dieselfde neiging het by Regal Seedless-druiwe voorgekom. Daar was nie betekenisvol meer of minder oppervlakkige óf interne verbruining by druiwe wat teen -2 °C verkoel is en dié wat teen 2 °C koud geblaas is nie.

Na gelang van 'n kartonhouer se posisie of plek op die palet kan druiwe in sekere posisies sewe uur langer neem om -0,5 °C te bereik as druiwe op ander plekke op die palet. Druiwe wat vinnig afgekoel het vanweë 'n bepaalde posisie op die palet het geen betekenisvolle verskil getoon in die voorkoms van oppervlakkige of interne verbruining nie, in vergelyking met druiwe afkomstig van posisies waar die druiwe stadiger afgekoel het. Soortgelyke resultate is by Regal Seedless en Majestic gekry.

29 Oktober 2004