Amerika se fitosanitêre mark word as die strengste ter wêreld beskou. Dié land stuur byvoorbeeld sy eie inspekteurs na betrokke uitvoerlande om seker te maak hul vrugte is vry van valskodlingmot, vrugtevlieg en ander saamryers.

’n Saamstaanpoging soos min onder Suid-Afrikaanse boere om hul produk na dié land uit te voer, lewer egter dividende op. Die Wes-Kaapse Sitrusprodusenteforum (WK SPF) is sprekend van die voordele wat samewerking vir boere inhou. 

Die forum se uitvoerprogram groei met tot 15% per jaar en regstreekse bestellings van supermarkreuse, soos WalMart en Costco,  neem toe. Die vierde van twaalf skepe met lemoene en sagte-sitrus wat vir die veeleisende Amerikaanse mark bestem is, is  onlangs op die Kaapstadse hawe gelaai.

350 boere
Die forum bestaan uit sowat 350 sitrusboere uit die Wes- en Noord-Kaap. Hulle doen saam hul verpakking, ver­skeping, verspreiding en bemarking van die lemoene (Nawels en Midknights) en sagte-sitrus (Clementines) vir Amerika.

Aangesien hulle in gebiede boer wat redelik plaag- en siektevry is, is hulle die enigstes wat toegelaat word om na Amerika uit te voer.

Die program is in sy 13de bestaansjaar en die produsente bevrag hul eie skepe (daar is nie gereeld skepe Amerika toe nie). Die ver­skeping kos die produsente by die R90 miljoen per jaar, maar dit word as een van die belangrikste pilare in die sukses van die program beskou. Altesame 85% van die totale tonnemaat word verskeep.