Two Oceans help seelewe

Two Oceans het hulle agter die bewaring van seelewe geskaar. Foto: VERSKAF

Een van Suid-Afrika se bekende wynhandelsmerke, Two Oceans, het hulle agter die bewaring van seelewe geskaar. Luidens ’n verklaring steun hulle die South African Sustainable Seafood Initiative (SASSI) wat die bewaringstatus van bedreigde seelewe in plaaslike oseane verbeter.

In die eerste insiatief wat Two Oceans finansier, word beursiegrootte inligtingskaartjies gedruk waarvolgens vis wat geëet kan word sonder om hulpbronne te bedreig, geïdentifiseer. Die kaartjies identifiseer ook vissoorte wat bedreig word of op die punt van bedreiging staan. Dit word in viswinkels, restaurante en by kleinhandelaars versprei. 

Die volgende fase

Die volgende fase van die samewerkingsooreenkoms berus op die bewusmaking van die publiek in winkels oor vissoorte en die bevordering van visvang- en visboerderymetodes wat minder gevaar vir die omgewing inhou. Met die kennis kan verbruikers meer ingeligte keuses maak om die marinebedryf te help bevorder.

Me. Jackie Olivier, globale handelsmerkbestuurder van Two Oceans, sê die Atlantiese en Indiese Oseane waarna hul handelsmerk genoem is, “het nie net ’n belangrike invloed op die wyne wat ons maak nie.  Hulle onderhou ook ’n enorme verskeidenheid van lewe. Dis hoekom ons SASSI se veldtog ondersteun wat wys hoe maklik dit is om ’n volhoubare seekoskeuse te maak wanneer geëet of gekoop word."

"SASSI verduidelik hoekom nie alle seekos gelyk is nie en moedig ons aan om te vra watter vis voorgesit word, waar dit vandaan kom en hoe dit bekom is, sodat ons almal kan help om ’n verskil te maak.”

Die onderneming beoog om ook by soortgelyke projekte in ander wêrelddele betrokke te raak.

Vir meer inligting oor SASSI, besoek die webblad www.wwf.org.za/sassi.

5 April 2011