Spier-wyne naby Stellenbosch gee vanjaar ’n tuiste aan die Pietman Hugo-trofee. Dié kelder het die meeste punte in vyf kategorieë op die SA Jongwynskou ingesamel.  Hy spog met nie minder nie as drie Suid-Afrikaanse kampioene: Chenin blanc (gehout), Chardonnay (gehout) en Merlot (gehout).

Die jongwynskou het vanjaar 2 124 inskrywings van 149 deelnemers uit al die wynstreke gelok.

“Dit gee ’n aanduiding van die wynmakers en wingerdboukundiges se vertroue in Suid-Afrika se grootste en oudste wynskou,” het die seremoniemeester Johan Rademan gesê.

Sowat 40% van die inskrywings het uit die Breedekloof-Worcester-gebied gekom. Stellenbosch het egter die meeste klaswenners en goue medaljes opgelewer.

Sauvignon blanc die gewildste
Sauvignon blanc het die meeste inskrywings (121) gelok. Gehoute Shiraz en rooi versnitwyne was kort op die wit kultivar se hakke.

Die nuwe voorsitter van die Suid-Afrikaanse Nasionale Wynskouvereniging (SANW), mnr. Charles Hopkins, het gesê hy wil weer die gees van die Jongwynskou laat herleef. Sy visie is dat deelnemers uit die beoordelaars se terugvoering leer. Hy hoop statistiek oor wenners kan aan die bedryf neigings oor wynstyle en produksiemetodes uitwys.

Hopkins het ook aangekondig dat die Raad van die SA Jongwynskou’n botteletiket vir die Generaal Smuts-trofee goedgekeur het. Dié wenwyn sal dus voortaan met ’n plakker spog.

Die Vergelegen- en Badsberg-wynkelder het elkeen twee kampioenwyne opgelewer. Nege ander kelders spog ook met kampioene: Flagstone Winery, Namaqua Wines, Mountain Ridge Wines, De Krans, Slanghoek-kelder, Merwida-wynkelder,Oranjerivier-wynkelders (Groblershoop), Bon Courage en Neethlingshof.



Die opgewonde span van UniWines in die Breedekloof met die Genl. Jan Smuts-trofee. Die wynmakers is Schalk van der Merwe, Charl Myburgh, Hattingh de Villiers, Gert Engelbrecht (wingerdboukundige), Nicolaa Rust (produksiebestuurder), Christo Smit en W.S. Visagie. Foto: LUCILLE BOTHA