Ford Ranger is 'n bielie

Met die Ford Ranger kan ’n mens ook veldryroetes aandurf.

As jy alles moet glo wat jy hoor, is die nuwe Ford Ranger ’n meneer van ’n bakkie wat geen tree agteruit hoef te staan vir die Toyota Hilux, Volkswagen Amarok, Isuzu KB of die Nissan MP300 nie.

Trouens, die Ford-mense reken as jy na gehalte, toerusting, vermoë, keuse van enjins en prys kyk, het hulle ’n wenner. Bakkie-kopers in Suid-Afrika het vandag ’n keuse soos nog nooit tevore in die geskiedenis nie.

Groot mededinging
Afgesien van die gevestigde name, hoofsaaklik van Japanse oorsprong, word die mark deesdae oorstroom met goedkoop (of goedkoper) enkel- en dubbelkajuitbakkies van Chinese vervaardigers, waarvan die gehalte in die afgelope twee tot drie jaar ongelooflik verbeter het.

’n Goeie voorbeeld is GWM, wie se gehalte, voorkoms en toerusting van die allerbeste is. Dis nou hierdie bokskryt wat Ford met die nuwe, heel aantreklike Ranger betree. Nou moet ’n mens darem sê dat Ford sy huiswerk gedoen het.

Hy het oor die hele wêreld gaan navorsing doen voordat die voorkoms en spesifikasie van die nuwe bakkie gefinaliseer is. Boonop het Ford al die moontlike gedoen om te verseker dat die bakkie so veilig moontlik is. Gevolglik spog die Ranger met ’n vyfster-aanslag in die strawwe Euro NCAP-botstoetsprogram – die enigste bakkie waaraan hierdie hoogste aanslag ooit toegeken is.

'n Model vir elke man
Om elke hoekie en gaatjie van die mark by te kom, bestaan die Ranger-reeks uit nie minder nie as 23 modelle, enkel- en dubbelkajuit, twee- en vierwieldryf en petrol en diesel. En die prys is reg – dit strek van R174 000 vir ’n enkelkajuit, R228 000 vir ’n SuperCab, R259400 vir die goedkoper dubbelkajuite en daarvandaan tot R436 700 vir die 3,2 liter-XLT 4x4-dubbelkajuitdiesel met ’n outomatiese sesgangratkas.

Diesel- en petrolkragbronne word ingespan. Die dieselenjinreeks spring weg met ’n splinternuwe 2,2 liter-Duratorq-turbodiesel met twee leweringsvlakke (88 kW en 285 N.m, en 110 kW en 375 N.m). Die vlagskip-diesel is ’n vyfsilinderenjin van 3,2 liter wat 147 kW en 470 N.m wringkrag ontwikkel.

Dan is daar ’n verbeterde 2,5 liter-Duratec-petrolenjin van 112 kW wat 226 N.m wringkrag lewer. Die Ford-bakkies het ’n 80 liter-tenk. Met van dieselmodelle kan jy, as jy ligvoet bestuur, tot meer as 1 000 km haal voordat jy vir brandstof hoef stil te hou.

Ruim en gerieflik
Die petrolmodelle is toegerus met ’n vyfganghandratkas, maar in van die dieselmodelle het kopers ’n keuse tussen sesgangratkaste, handrat en outomaties. Die kajuite, enkel- en dubbelkajuit, is besonder ruim (die meeste beenruimte in die klas), gerieflik en goed toegerus.

Die deftiger, duurder modelle kom selfs standaard met dinge soos Bluetooth-, USB- en iPod-verbinding, stembeheer vir die radio, elektroniese klimaatbeheer, snelheidsbeheer, en dies meer.

Dis nou afgesien van elektriese ruit- en kantspieëlverstelling, ABS-remme, lugsakke, kragstuur en hope pakplek in die kajuit. Vir gemoedsrus kom die Rangers met ’n versieningsplan van vyf jaar of 90 000 km, ’n omvattende waarborg van vier jaar of 120 000 km en drie jaar se padbystand. Hulle moet elke 15 000 km versien word.

Om in landbouwiele te adverteer, kontak:
Stanton Porter Marketing, tel. 012 654 2745 faks 012 654 0114 of e-pos sharon@stanport.co.za
Redaksionele navrae:
Teddy Knoetze, sel 082 456 3454.

5 Desember 2011