Nuwe Ford Ranger is hier

Mnr. Hugo Lochner, redakteur van Landbouweekblad by ’n Ford Ranger.

Ford se nuwe reeks Ranger-bakkies het boere al die afgelope maande aan die praat gehad, onder meer tydens ’n voorbekendstelling by vanjaar se Nampo-Oesdag. Nou gaan die bakkies die mark tref.

Die reeks van 18 modelle, wat wissel van enkel-, super- en dubbelkajuitbakkies met verskillende enjingroottes en ander eienskappe, is vandeesweek buite Nelspruit aan die media bekend gestel. Die Ranger is van die grond af ’n algeheel nuutontwerpte bakkie en beloof om ’n revolusie in die bakkiemark te ontketen.

Alles in die bakkies is nuutontwerp – van die enjins, ratkaste, onderstelle, raamwerk, stuur- en remstelsel tot die luukse-binneruimtes met seker die meeste bêreplekke wat enige bakkie kan bied.

Die Ranger is heelwat groter as sy voorganger en die meeste mededingers met ’n vragvermoë van meer as 1 200 kg en touvermoë van 3 350 kg. Die onderskeie modelle word aangedryf deur enjins wat wissel  van 2,2 liter en 3,2 liter Duratorq TDCi-dieselenjins en ’n 2,5 liter Duratec-petrolenjin.

Kenmerke
Uitsonderlike kenmerke by sommige modelle sluit in sesgang-hand- of outoumatiese ratkaste, ’n grondvryhoogte van 237 mm met volle vrag op, ’n waterdiepte van 800 mm en verskeie hulpmiddels om die padhouvermoë op ruwe terrein te vergemaklik.

Die Ranger sal op drie vastelande vervaardig word. In Suid-Afrika sal die Ranger by Ford se Silverton-aanleg vervaardig word vir uitvoer na 148 ander lande.

“Die nuwe Ranger is die resultaat van jare se spanwerk deur honderde ingenieurs en Ford-personeel wêreldwyd. Dit het die vermoë, gemak, krag, brandstofdoelteffendheid en veiligheid wat enige voornemende eienaar kan verwag en ons glo dit sal ’n markleier wees,” spog mnr. Ben Pillay, bemarkingsbestuurder van die Ford-motormaatskappy van Suid-Afrika (FMSA). 

26 Oktober 2011