Innova: Meer as genoeg spasie

Die ruim kajuit van die Innova.

Ma se Taxi, groot gesinsbus, ruim vakansie- en uitspanwa. Wat ook al jou behoeftes, Toyota het nou die vuurwa vir jou: Die Innova. Jy gaan nooit weer kla oor te min plek in jou motor nie – en ook nie dat jou vuurwa nie genoeg krag het nie.

Daar is twee modelle, ’n sewe- en ’n agtsitplek, wat albei aangedryf word deur Toyota se vertroude VVT-i-petrolenjin van 2,7 liter (118 kW by 5 200 r/min. en 241 N.m wringkrag by 3 800 r/min.). Brandstofverbruik, sê Toyota, is 11,2 liter/100 km. Vir wat jy kry, is die pryse besonder billik.

Die agtsitplekmodel kos R249 700, terwyl die deftiger sewesitplekweergawe, wat onder meer met leerbekleedsel spog, R265 500 kos. Ingesluit in die prys is ’n versieningsplan van vyf jaar of 90 000 km en ’n waarborg van drie jaar of 100 000 km. Die Innova moet elke 15 000 km versien word.

Alte deftig
Binne is die Innova-modelle alte deftig, met geriefies soos Optitron-instrumentasie, ’n vertoonskerm vir inligting, soos brandstofverbruik, buite-temperatuur en gemiddelde snelheid, elektriese ruitverstelling, satellietkontroles vir die klankstelsel aan die stuurwiel, ’n dubbele outomatiese lugversorger (met luguitlate vir elk van die drie sitplekrye) en dies meer.

Twee lugsakke en ABS-remme is standaard. Aan plek is daar geen tekort nie. Die sewesitplek het boonop individuele “kaptein”- sitplekke in die middelste ry, wat jy vorentoe en agtertoe kan skuif en kantel, terwyl die agtsitplekmodel ’n banksitplek in die middel het.

Jy kan die middelste sitplekke platvou en vorentoe kantel, terwyl die derde ry sitplekke soos dié van die Fortuner na die kante toe weggevou kan word.

Die Innova is ideaal as ruim ryding vir die gesin.

Om in landbouwiele te adverteer, kontak:
Stanton Porter Marketing, tel. 012 654 2745 faks 012 654 0114 of e-pos sharon@stanport.co.za
Redaksionele navrae:
Teddy Knoetze, sel 082 456 3454.

29 November 2011