Greenfields Agricultural Holdings van Mooiriver in KwaZulu-Natal het onlangs Suid-Afrika se alleeninvoerder en -verspreider van die JCB Workmax 800D-nutsvoertuig geword.

Die nuweling is deur JCB in Brittanje ontwerp, ’n Japanse enjin word ingespan en dit word in China vervaardig. Dit is ’n kompakte, vierwielaangedrewe nutsvoertuig met sitplek vir twee mense en ’n netjiese, klein wip-laaibak agter.

Mnr. James Smart, hoof uitvoerende beampte van Greenfields Agricultural Holdings, sê die 800D bied ’n logiese keuse vir ’n boer wat ’n vierwiel-motorfiets of ander nutsvoertuig wil aanskaf. Dit is ’n veeldoel-voertuig en met sy vierwiel-trekvermoë kan dit maklik die werk van ’n kleiner bakkie of selfs ’n ligte trekker en sleepwa doen.

Die Japanse Yanmar-dieselenjin verplaas 800 cm3 en dit spog met 14,9 kW drywing en 45 N.m wringkrag. Krag word met ’n kevlar-dryfband na die palwisselratkas en dan na die wiele verplaas. Die ratkeuses is hoog, laag, tru of ontkoppel en die ewenaarsper en die 4x4-stelsel word elektronies op die instrumentepaneel ingeskakel.

Kompakte ontwerp
’n Stewige skutplaat is aan die onderkant vasgebout en beskerm kwesbare dinge, soos die enjin se oliebak, ratkas en dryfasse.

Die voorste veerstelsel is onafhanklik met dubbele mikke en progressiewe kronkelvere, terwyl laasgenoemde ook by die agterste veerstelsel ingespan word. En wanneer dinge effe vinnig begin gaan, is daar vier skyf­remme en ’n onafhanklike remskyf wat as deel van ’n meganiese noodrem diens doen.

Die 800D het ’n kompakte ontwerp met ’n stewige voorkoms met die vier wiele op die hoeke van die voertuig geplaas. Terloops, laasgenoemde is nuttig met groot aantree- en verlaathoeke.

Dit is 2,8 m lank, 1,5 m breed en 2 m hoog. Die asafstand is 1,9 m en die voor- en agterwiele is onderskeidelik ’n raps meer en ’n raps minder as 1,2 m uitmekaar geplaas. Die grondvryhoogte van 265 mm tel sommer baie pluspunte wanneer die 800D in die veld gebruik word.