Bekende in wolkringe sterf

Mnr. Briers Bekker, gewese voorsitter van Cape Wools en 'n bekende in wolkringe, is op 16 September onverwags oorlede. Hy sou op 28 September 51 jaar oud geword het.

Bekker, 'n boer van Steynsburg, was sedert die stigting van Cape Wools in 1997, voorsitter tot 2004.

Hy het in die laat 1980's sy stempel op die wolbedryf begin afdruk toe hy in 1987 as lid van die ministeriële komitee van ondersoek na wolbemarking en velddienste benoem is.

In 1988 is hy as hy bestuurslid van die Nasionale Wolkwekersvereniging (NWKV) verkies en was hy van 1993 tot 1996 voorsitter van die Kaaplandse tak. In 1995 het hy nasionale ondervoorsitter van die organisasie geword, 'n posisie wat hy tot 1998 beklee het.

As lid van die NWKV was hy betrokke by die stigting van NWKV-takke in die voormalige Ciskei en Transkei om ontluikende boere te betrek. As voorsitter van Cape Wools was hy die dryfkrag agter inisiatiewe om wolproduksie in dié gebiede te verhoog en die gehalte van die wol te verbeter.

Hy het die Suid-Afrikaanse wolbedryf in die buiteland verteenwoordig en was onder meer 'n direkteur van die Internasionale Wolsekretariaat.

Hy het jaarliks die vergaderings van die Internasionale Woltekstielorganisasie bygewoon en is in 1999 tot voorsitter van die produsentegroep van die organisasie verkies wat die produsente van die grootste woluitvoerlande, soos Australië, Nieu-Seeland, Uruguay, Argentinië en Brittanje, verteenwoordig het.

Hy het tydens sy openbare loopbaan ook talle ander posisies in die landbou beklee.

Hy laat sy vrou, Agneta, en twee kinders, Fred (20) en Francisca (18) agter.

30 September 2005