Benede-Oranje se boere 'verraai'

Boere aan die Benede-Oranjerivier word deesdae twee keer verraai — deur die Regering én handelsbanke, sê mnr. Carel Boshoff, Noord-Kaapse leier van die Vryheidsfront Plus.

Veral tafeldruifprodusente aan die Benede-Oranjerivier is die afgelope paar seisoene hard deur die sterker rand getref.

Boshoff sê in 'n verklaring die Suid-Afrikaanse landbou is in sy geheel sonder enige beskerming aan vernietigende globale markkragte uitgelewer. Dit is in skerp teenstelling met die meeste lande met wie plaaslike boere op die wêreldmarkte moet meeding. Dit bring ook mee dat handelsbanke hul risiko-blootstelling in die landbou drasties probeer verlaag.

"Boerdery is nie net aan bedryfsrisiko's soos oorproduksie en wisselkoersskommelings blootgestel nie, maar ook aan onvoorspelbare en onbeheerbare natuurkragte. Daarom geniet boere wêreldwyd die steun en beskerming van regerings, " sê Boshoff.

Hierenteen het me. Tina Joemat-Petterson, Noord-Kaapse LUR vir landbou, vroeër gesê kommersiële boere moet op hul eie reserwes staatmaak om skommelings te oorbrug. Dit wek die indruk dat die Regering blanke boere met globale markskommelings onder druk probeer plaas en die herverdeling van grond bevorder, meen Boshoff.
Een gevolg is dat handelsbanke in die Benede-Oranjerivier 'n "uiters onsimpatieke houding" jeens boere inneem, sê hy.

"Ou en gevestigde kliënte, selfs van die grootste boere in die streek, word deur ondergang bedreig omdat die boerderybedryf sonder 'n lojale owerheid te 'n groot risiko verteenwoordig, " lui die verklaring.

1 April 2005