Beraad 'is 'n nuwe begin'

Ter wille van 'n nuwe begin en 'n nuwe konsensus in die landbou is dit nodig dat plaaswerkers keel skoonmaak oor die dinge wat hulle pla. Dit is sodat ál die belangegroepe kan verstaan waar die ander vandaan kom, het mnr. Ebrahim Rasool, die Wes-Kaapse premier, verlede week op die plaaswerkerberaad op Elsenburg, naby Stellenbosch, gesê.

"As daar nie harde woorde val nie, is daar iets fout, want ná tien jaar van demokrasie voel talle mense dat min nog verander het."

Hy sê die landbou in die provinsie moet verdedig word teen wat in die wêreldmarkte gebeur, maar dit is noodsaaklik om eers op die plaas te begin. "Sterk emosies oor wat in die verlede gebeur het beteken dat belanghebbendes op dieselfde plaas mekaar soms teenstaan, terwyl hulle eintlik moet saamwerk. Uitdagings soos die sterk rand, veesiektes en plaasmoorde bring plaaswerkers ook in die gedrang."

Volgens hom is die beraad die eerste stap om verhoudings tussen boere en plaaswerkers in die provinsie te verbeter en 'n tuiste vir almal in die landbou te skep.

Soos in enige verhouding tussen 'n werkgewer en 'n werknemer sal daar van tyd tot tyd wrywing wees. "Plaaswerkers sal nooit tevrede wees met hul vergoeding nie en boere sal altyd meer van hul werkers verwag. Hierdie verskille moet egter nie tot diepgaande konflik opgeblaas word nie," sê Rasool.

Omdat boere en werkers van mekaar afhanklik is, moet en kan hulle wedersydse respek teenoor mekaar betoon.

Hy sê die "nuwe konsensus" waarna gestreef word, kan deur grondhervorming en swart ekonomiese bemagtiging bereik word. Die skeefgetrekte neiging van eienaarskap wat tans bestaan, kan nie so voortgaan nie. Die diversifisering van eienaarskap moet die landbou versterk, nie verswak nie. Dit is daarom nodig om te praat oor hóé dit gedoen moet word.

"Die landbou is 'n vliegtuig wat reggemaak moet word terwyl hy vlieg."

Boere wat nie hul werkers nuwe vaardighede wil laat aanleer nie, doen dit ten koste van hulself, meen Rasool. Opleiding is 'n belangrike aspek van bemagtiging.