'Besoedeling onteien boere'

Mnr. Hans van der Merwe, uitvoerende direkteur van Agri SA, sê die besoedeling van grond en water onteien boere. "As jou grond onbruikbaar raak is jy onteien van jou grond en as jou water nie meer bruikbaar is nie, is jy onteien van jou water."

Agri SA en Nafu moet hulle verskille opsy skuif en uit een mond praat om te verhoed dat stygende besoedelingsvlakke tot die totale ineenstorting van die kommersiële landbou in Mpumalanga lei, se mnr. Motsepe Matlala, voorsitter van Nafu.

Matlala het tydens 'n boerevergadering oor besoedeling in die Delmas-skousaal gesê 'n baie spesiale poging wat verder as politieke oortuigings en velkleur strek moet aangepak word om die bedreiging van besoedeling af te weer.

"Dit sal 'n groot samewerkingspoging vra om uit een mond te praat om die besoedelingsprobleem aan te spreek. As ons nie nou opstaan vir ons regte nie, sal daar nie meer ruimte vir landbou in die provinsie wees nie. Mynbase glo reeds dat Mpumalanga 'n myn- eerder as 'n landbou-provinsie gaan word. 'n Mens kan mos nie praat van 'n "2010" as die landbousektor op die vooraand van ineenstorting staan nie," het Matlala gesê.

19 Maart 2009